Hövsanda təhlükəli vəziyyət: Sakinlər risk altındadır - VİDEO

25 May 2022 15:52

Bu xəbərimiz Hövsanda yerləşən yaşayış binaları ilə bağlıdır. Daha doğrusu, bu binaların girişlərində sakinlərin həyatına təhlükə saçan beton plitələrdən danışacağıq. Söhbət ondan gedir ki, həmin ünvanda doqquzmərtəbəli binanın bir girişindəki beton plitələr uçub, digər girişlərdəki plitələr də qəzalı vəziyyətdədir. Sakinlər aidiyyəti qurumlara dəfələrlə müraciət etdiklərini deyirlər.

Milli.Az Xəzər TV-yə istinadən bildirir ki, vaxtında tədbir görülmədi və nəticədə yaşayış binasının girişində beton plitələr qəfil uçdu. 

Paytaxtın Suraxanı rayonu, Hövsan qəsəbəsi İlqar Əhlimanov küçəsində yerləşən bu binalarda yaşayan sakinlər hər dəfə evlərinə girib-çıxanda ciddi təhlükə ilə üzləşdiklərini deyirlər.

Qəsəbənin mərkəzində yerləşən 4 doqquzmərtəbəli yaşayış binasının girişləri qəzalı vəziyyətə düşüb, həyət isə baxımsız vəziyyətdədir.

Sakinləri narahat edən problemlə bağlı 103 saylı mənzil kommunal istismar sahəsinin rəisi İlham Bayramov ''Xəzər Xəbər''ə bildirdi ki, məsələdən xəbərdardırlar və problem tezliklə həll ediləcək.

Qeyd edək ki, yaşayış binaları 1986-cı ildə inşa olunub.

Milli.Az