Unsuz hazırlanan "fit" poğaça resepti

Klassik poğaçalara daha yüngül və sağlam bir alternativ axtaranlar üçün bu resept mükəmməldir. Yulafın toxluq hissi verən xüsusiyyəti pendir və təzə göyərtilərlə birləşərək həm dadlı, həm də faydalı bir qəlyanaltı yaradır. Səhər yeməkləri, ara payları və ya çay süfrələri üçün ideal seçimdir.

Milli.Az lazım olan ərzaqları təqdim edir:

2 ədəd yumurta (birinin sarısını üzəri üçün ayırın)

1 stəkan qatıq

3 xörək qaşığı zeytun yağı

1 çay qaşığı alma sirkəsi

1 çay qaşığı soda (karbonat)

1 çay qaşığı duz

2,5 stəkan incə çəkilmiş yulaf əzməsi

150 qr ağ pendir

4-5 ədəd yaşıl zeytun

1 ədəd kiçik yaşıl bibər

Yarım kiçik pomidor

2 xörək qaşığı incə doğranmış şüyüd

2 xörək qaşığı incə doğranmış cəfəri

Üzəri üçün: Yumurta sarısı, küncüt, çörəkotu.

Hazırlanması:
Qatıq, yumurta, zeytun yağı və sirkəni geniş bir qabda qarışdırın. Soda və duzu əlavə edib qarışığı homojen hala gətirin.

Ağ pendiri əzin, zeytunları halqa-halqa, bibər və pomidoru isə kiçik kubiklər şəklində doğrayın. Hazırladığınız tərəvəzləri, pendiri və incə doğranmış göyərtiləri qarışıma əlavə edin.

Yulaf əzməsini nəzarətli şəkildə əlavə edərək, ələ bir az yapışan, lakin rahat forma verilə bilən bir xəmir hazırlayın.

Xəmirdən naringi böyüklüyündə parçalar götürüb yuvarlayın və yüngülcə basaraq forma verin.

Yağlı kağız sərilmiş soba tavasına aralıqlı şəkildə düzün. Üzərinə ayırdığınız yumurta sarısını çəkin, küncüt və çörəkotu səpin.

Əvvəlcədən isidilmiş 180 dərəcəlik sobada üzəri yaxşıca qızarana qədər təxminən 30-35 dəqiqə bişirin.

Yulaf miqdarını nəzarətli əlavə edin; çox yulaf xəmirin bərk, poğaçaların isə quru olmasına səbəb ola bilər.

Daha yaxşı tekstura üçün yulaf əzməsini blenderdən (rondodan) keçirərək daha incə hala gətirə bilərsiniz.

Xəmiri hazırladıqdan sonra 5-10 dəqiqə dincəlməyə qoyun ki, yulaf mayeni tam çəksin.

Poğaçaların eyni böyüklükdə olması onların bərabər bişməsini təmin edər.

Poğaçaları hava keçirməyən qabda saxlamaqla bir neçə gün təzəliyini qoruya bilərsiniz.

Nuş olsun!

Müəllif: Ülkər Vəliyeva (Milli.Az redaktor)