Kulinariya

15 dəqiqəyə Xaçapuri necə hazırlanır?

28 Yanvar 2026 00:49

Baxış: 253

VTB-də minimal faiz dərəcəsi ilə nağd kredit 10.49%-dən

#KULİNARİYA

Gürcü mətbəxinin vizit kartı sayılan Xaçapuri adətən mayalı xəmirlə hazırlanan və vaxt aparan bir yeməkdir. Lakin bu yeni resept sayəsində cəmi 15 dəqiqəyə, soba istifadə etmədən, tavada möhtəşəm bir dad əldə edə bilərsiniz. Səhər yeməyi və ya qəfil qonaqlar üçün ideal seçimdir!

Milli.Az lazım olan ərzaqları təqdim edir:
1 ədəd yumurta

1 stəkan süd

1 stəkan un

300 qram rəndələnmiş pendir (Gürcü üsulu üçün Sulquni və ya İmereti, alternativ olaraq Mozzarella və ya yağlı holland pendiri)

1 xörək qaşığı kərə yağı (tavada bişirmək üçün)

Bir çimdik duz

Hazırlanma qaydası:
Geniş bir qabda yumurta, süd və duzu yaxşıca çırpın. Üzərinə ələnmiş unu əlavə edərək tamamilə hamar, axıcı bir xəmir əldə edənə qədər qarışdırın.

Rəndələnmiş pendiri xəmirin içinə tökün. Xəmir və pendir tamamilə bir-birinə qarışmalıdır. Bu üsulda pendir xəmirin daxilində olduğu üçün hər tikədə eyni ləzzəti alacaqsınız.

Yapışmayan tavanı ocağın üzərinə qoyun və kərə yağını əridin. Hazırladığınız qarışığı tavaya tökün və bir qaşıq vasitəsilə bərabər şəkildə yayın.

Tavanın qapağını bağlayın və vam odda alt hissəsi qızılı rəng alana qədər (təxminən 5-7 dəqiqə) bişirin. Sonra xaçapurini ehtiyatla çevirin (boşqab yardımı ilə edə bilərsiniz) və digər üzünü də qapaqsız şəkildə qızardın.

Xaçapurinin əsl sirri əriyən və bir az duzlu olan pendirdədir. İki növ pendiri qarışdıraraq daha zəngin dad əldə edə bilərsiniz.

Bişdikdən sonra xaçapurinin üzərinə hələ istiykən bir az da kərə yağı çəksəniz, xəmir daha yumşaq və parlaq olar.

Lalə Qüdrətova
Milli.Az