Sobaya ehtiyac yoxdur: Qazanda 10 dəqiqəyə şokoladlı sufle

Soba istifadə etmədən də sufle ləzzətini dadmaq istəyənlər üçün buxarda bişən, kənarları yüngül qabarmış, içi isə yumşaq və axan şokoladlı bu praktik şirniyyat əsl xilaskardır. Xüsusilə ani şirniyyat istəklərində və ya qəfil qonaq gəldikdə cəmi 10 dəqiqəyə hazır olur.

Milli.Az xəbər verir ki, bu üsulda fincanlar qaynar suyun içinə yerləşdirilir və buxar vasitəsilə bişirilir. Nəticədə şokolad ətri kəskin olan, süngərvari teksturaya malik mükəmməl bir şirniyyat alınır.

Lazım olan məhsullar

Suflenin yaxşı qabarması üçün təzə və otaq temperaturunda olan yumurta seçin. Şəkərlə çırpıldıqda daha yaxşı köpürür.

İçinin axan və tünd şokolad dadlı olması üçün kakao miqdarı yüksək (60% və daha çox) olan tünd şokoladlara üstünlük verin.

Təzə və topaqlanmamış kakao istifadə edin. Əlavə etməzdən əvvəl ələmək qarışığın hamar olmasını təmin edər.

Addım-addım hazırlanma qaydası
Dərin bir qabda yumurta və şəkəri köpüklənənə qədər yaxşıca qarışdırın.

Əvvəlcə bitki yağını əlavə edib qarışdırın, sonra südü tökərək hamar bir kütlə alınana qədər davam edin.

Un, kakao, vanil və qabartma tozunu birlikdə ələyərək qarışığa qatın.

Topaq qalmayacaq şəkildə çırpın; axan, lakin düzgün konsistensiyalı xəmir əldə edin.

Xəmiri fincanlara tökün. Fincanları tam doldurmayın, yarısından bir az çox olması kifayətdir ki, qabarma payı qalsın.

Tünd şokoladı parçalara ayıraraq fincanların mərkəzinə qoyun (istəsəniz bir az içinə doğru sıxa bilərsiniz).

Qazanda qaynatdığınız suyun içinə fincanları ehtiyatla qoyun. Su səviyyəsi fincanların yarısına qədər gəlməlidir.

Qazanın qapağını bağlayın və sufleləri buxarda 10 dəqiqə bişirin.

Qapağın altındakı buxar damcılarının suflenin üzərinə tökülməməsi üçün qapağın iç hissəsinə təmiz mətbəx dəsmalı sərib sonra bağlayın.

İsti halda üzərinə şəkər pudrası səpin və gözləmədən süfrəyə verin.

Nuş olsun!

Lalə Qüdrətova
Milli.Az