Briqada generalı Laura Yeqer ABŞ ordusunun piyada diviziyasına rəhbərlik edən ilk qadın olacaq.
Milli.Az AZƏRTAC-a istinadən bildirir ki, əvvəllər İraqda "Black Hawk" helikopterlərinin uçuşlarına rəhbərlik etmiş Laura Yeqer Kaliforniya milli qvardiyasının 40-cı piyada diviziyasının komandiri vəzifəsini iyunun axırlarında Los-Alamitosda koalisiya qüvvələrinin təlim bazasında keçiriləcək rəsmi mərasimdə qəbul edəcək.
Leytenant Conatan Şiroma "USA TODAY" qəzetinə müsahibəsində deyib: "Mənim fikrimcə, bu, Kaliforniya milli qvardiyası üçün mühüm məqamdır. Laura Yeqer batalyon komandiri, briqada komandiri olub, indi isə diviziya komandiri olacaq. O, buna layiqdir".
Yeqer 10.000-dən çox əsgəri birləşdirən bu diviziyanın idarə edilməsinə görə məsuliyyəti general-mayor Mark Malantidən qəbul edəcək.
Yeqer orduda xidmətə 1986-cı ildə Lonq-Biçdə Kaliforniya Dövlət Universitetində ehtiyatda olan zabitlər hazırlayan korpusu bitirərək kiçik leytenant rütbəsində başlayıb. 1989-cu ildə hərbi helikopterlərin idarə edilməsi üzrə təhsilini başa vurduqdan sonra "UH-60 Black Hawk" helikopterlərində tibbi təxliyə pilotu kimi xidmət edib.
Milli.Az