Çex Respublikası boş iş yerlərinin sayına görə Aİ üzvü olan digər ölkələrlə müqayisədə yenə birinci yerdədir.
Milli.Az AZƏRTAC-a istinadən bildirir ki, 2018-ci ilin ikinci rübündə Avropa İttifaqı məkanında boş iş yerlərinin sayı orta hesabla 2,2 faiz olduğu halda, Çexiyada bu göstərici artaraq 5,4 faizə çatıb. Bu, Aİ ölkələri arasında ən yüksək artım göstəricisidir.
Boş iş yerlərinin yüksək sayına görə ikinci yeri Belçika (3,5 faiz), sonrakı yerləri Niderland (3,1 faiz) və Almaniya (2,9 faiz) tutur. Bu göstəricinin ən aşağı qiyməti Yunanıstanda qeydə alınıb (0,7 faiz). Bolqarıstan, İspaniya və Portuqaliyanın hərəsində boş iş yerlərinin sayı 1 faizə bərabərdir.
Milli.Az