Qarpızlar qəfildən köpüklənir: Səbəbi bəlli oldu

Sosial şəbəkələrdə yayılan "köpüklənən qarpız" videoları böyük panikaya səbəb olub. Vətəndaşların ard-arda paylaşdığı videolardan sonra mütəxəssislər vacib xəbərdarlıq ediblər.

Milli.Az xəbər verir ki, aldıqları qarpızları kəsərkən və ya saxlayarkən köpükləndiyini görən vətəndaşlar bu anları mobil telefonları ilə qeydə alaraq sosial şəbəkələrdə paylaşıblar.

"Qarpızlara kimyəvi maddə vurulur?" sualını ortaya çıxaran bu videolar qısa müddətdə minlərlə reaksiya alıb.

Köpüklənmənin arxasındakı gerçək: Fermentasiya
Sosial şəbəkələrdəki kimyəvi maddə və ya hormon iddialarının əksinə olaraq, mütəxəssislər bu vəziyyətin tamamilə bioloji bir prosesdən qaynaqlandığını bildirirlər. Qarpızın köpüklənməsinin əsas səbəbi yüksək temperatur altında baş verən "fermentasiya" (mayalanma) hadisəsidir.

Xüsusilə yay istilərində tarladan daşınarkən və ya market/bazar piştaxtalarında uzun müddət gün altında qalan qarpızların qabığında gözlə görünməyən kiçik çatlaqlar əmələ gələ bilər. Bu çatlaqlardan içəri sızan bakteriya və maya göbələkləri qarpızın tərkibindəki yüksək şəkərlə qidalanmağa başlayır. Bu qidalanma prosesi nəticəsində meyvənin daxilində karbon qazı əmələ gəlir. Qazın yaratdığı təzyiq, qarpız kəsiləndə və ya qabığı öz-özünə çatlayanda içindəki maye ilə birləşərək çölə köpük şəklində çıxır.

Köpüklənən bir qarpızla qarşılaşan vətəndaşlar bu meyvəni qətiyyən istehlak etməməlidirlər. Köpüklənmə, qarpızın içinin tamamilə çürüdüyünü, turşuduğunu və içində zərərli bakteriyaların törədiyini göstərən dəqiq bir işarədir. Bu cür qarpızların yeyilməsi ciddi qida zəhərlənmələrinə və mədə xəstəliklərinə səbəb ola bilər.

İstehlakçıların zərər görməməsi üçün qarpız alarkən xarici qabığında çat, əzik və ya həddindən artıq yumşalma olmamasına diqqət etməli; aldıqdan sonra isə meyvəni birbaşa günəş şüasına məruz qoymadan sərin bir yerdə saxlamalıdırlar.

Müəllif: Ülkər Vəliyeva (Milli.Az redaktor)