Yumurtanın təzə olub-olmadığını belə yoxlamaq olar

Yumurtanın təzə olub-olmadığını müəyyən etmək üçün ev şəraitində tətbiq edilə bilən sadə üsullar var.

Milli.Az demokrat.az-a istinadən xəbər verir ki, bu üsullar həm qida təhlükəsizliyi baxımından, həm də mətbəxdə daha keyfiyyətli nəticə əldə etmək üçün faydalıdır.

Mütəxəssislərin tövsiyə etdiyi ən praktik üsullardan biri su testidir. Bunun üçün dərin bir qaba soyuq su doldurub yumurtanı içinə yerləşdirmək kifayətdir.

Yumurta qabın dibinə üfüqi şəkildə çökürsə, bu, onun kifayət qədər təzə olduğunu göstərir. Dibə çökərək şaquli vəziyyətdə qalırsa, yumurtanın bir qədər köhnəldiyi, lakin hələ də istifadə edilə biləcəyi ehtimal olunur. Suyun səthinə çıxan yumurtalar isə içindəki hava boşluğunun böyüməsi səbəbindən daha bayat ola bilər.

Yumurtanın təzəliyini sındırdıqdan sonra da yoxlamaq mümkündür. Təzə yumurtada sarı daha hündür və yumru olur, ağı isə qatı qalaraq sarının ətrafında çox yayılmır. Köhnəlmiş yumurtalarda isə sarı daha yastı görünür, yumurta ağı isə durulaşaraq boşqabda daha geniş yayılır.

Digər üsullardan biri də yumurtanı yüngülcə silkələyərək səsinə qulaq asmaqdır. Təzə yumurtalarda daxili quruluş daha sıx olduğu üçün adətən səs eşidilmir. Köhnə yumurtalarda isə daxildəki mayenin hərəkəti səbəbindən zəif şappıltı səsi yarana bilər.

Yumurtanı sındırmadan yoxlamaq üçün işığa tutma üsulundan da istifadə olunur. Güclü işıq altında yumurtanın içindəki hava boşluğunu müşahidə etmək mümkündür. Təzə yumurtalarda bu boşluq kiçik olur, köhnə yumurtalarda isə daha böyük görünür.

Mütəxəssislər bildirirlər ki, bu sadə yoxlamalar yumurtanın istifadəyə yararlı olub-olmadığı barədə ilkin fikir verir. Bununla yanaşı, yumurta sındırıldıqdan sonra xoşagəlməz qoxu, qeyri-adi rəng və ya görünüş müşahidə edilərsə, onu istifadə etmək tövsiyə edilmir. 

Müəllif: Tural Hüseyn (Milli.Az redaktor)