İki güclü xarakterli insanın münasibətini nə bitirir?

İki güclü xarakterli insan münasibətdə bir araya gəldikdə, başlanğıcda bu əlaqə sanki atəşfəşanlığı xatırladır. Lakin zaman keçdikcə həmin enerji, əgər tərəflər vaxtında dayanmağı bacarmasa, münasibətə zərər verə bilər.

Milli.Az xəbər verir ki, psixoloqların fikrincə, güclü xarakterə malik insanlar tez-tez eyni səhvləri təkrarlayır və bu səhvlər münasibətləri qarşıdurma meydanına çevirir.

Birinci səhv liderlik uğrunda mübarizədir. Hər tərəf öz fikrinin daha vacib olduğunu sübut etməyə çalışır və dialoq rəqabətə çevrilir. Nəticədə müzakirə yox, inadkarlıq başlayır.

İkinci səhv hər şeyi təkbaşına həll etməyə çalışmaqdır. Güclü insanlar çox vaxt düşünür ki, işi daha yaxşı və daha tez görə bilərlər. Bu isə partnyorda lazımsızlıq hissi yaradır və o, tədricən uzaqlaşır.

Üçüncü səhv emosional açıqlığın olmamasıdır. Güclü xarakterlər hisslərini nəzarətdə saxlamağa öyrəşiblər. Lakin qarşı tərəf daxilində baş verənləri təxmin edə bilmir və bu, münasibətdə soyuqluq yaradır.

Dördüncü səhv isə dürüstlük adı altında sərt tənqiddir. Açıq danışmaq müsbət olsa da, bəzən bu, qarşı tərəfə hücum kimi qəbul olunur və müdafiə reaksiyası yaradır.

Beşinci səhv partnyoru dəyişdirməyə çalışmaqdır. Güclü insanlar tez-tez "doğrunu" bildiklərinə inanır. Amma təzyiq əks reaksiya doğurur və münasibətlər daimi mübarizəyə çevrilir.

Altıncı səhv münaqişə zamanı fasilə verməməkdir. Heç kim susmaq istəmir, çünki bunu zəiflik kimi qəbul edir. Halbuki qısa fasilə gərginliyi azaldır və söhbəti normal məcraya qaytarır.

Yeddinci səhv isə partnyorun ehtiyaclarını görməzdən gəlməkdir. Məqsədlər emosiyalardan üstün tutulur, lakin münasibətlər diqqət tələb edir. Bu diqqət olmadıqda, ən möhkəm əlaqələr belə sarsıla bilər.

Mütəxəssislər vurğulayır ki, hər iki tərəf güclü olduqda münasibət çox güclü və ilhamverici ola bilər. Lakin bu güc bir-birinə qarşı istifadə olunmadıqda. (Lent.az)

Milli.Az