Cəfərinin saralmaması üçün ən təsirli 5 üsul

Göyərtilərin, xüsusilə də cəfərinin tez saralması mətbəxdə ən çox rast gəlinən problemlərdən biridir.

Milli.Az cəfərilərin təravətini uzun müddət qorumaq üçün peşəkar məsləhətləri təqdim edir:

Doğru yuma və tam qurutma texnikası
Cəfərini aldıqdan sonra bol su ilə yuyun, lakin ən kritik məqam onu tam qurutmaqdır. Yarpaqların üzərində qalan nəm çürüməni və saralmanı sürətləndirir. Qurutmaq üçün salat qurudan cihazdan və ya təmiz mətbəx dəsmalından istifadə edə bilərsiniz. Tam quruduğuna əmin olmadan soyuducuya qoymayın.

Kağız dəsmal üsulu
Saxlama qabının içinə bir ədəd kağız dəsmal yerləşdirin. Kağız dəsmal artıq nəmi özünə çəkərək yarpaqların saralmasının qarşısını alacaq. Cəfəriləri qaba çox sıx olmadan yerləşdirib, üzərini yenidən kağız dəsmalla örtün və qapağını bağlayın. Bu üsulla göyərti 7-10 gün təzə qalır.

Bankada su içində saxlama
Cəfərini güldandakı çiçək kimi saxlamaq çox effektivdir. Saplarını yüngülcə kəsib az miqdarda su tökülmüş bankaya yerləşdirin (yalnız saplar suya dəyməlidir). Üstünə boş bir sellofan torba keçirərək mini "parnik" mühiti yaradın. Suyu iki gündən bir dəyişməklə uzunmüddətli təravət əldə edə bilərsiniz.

Hava sirkulyasiyasını təmin edin
Cəfəri tam havasız qaldıqda daha sürətli saralır. Bu səbəbdən tam vakuumlu qablardan qaçın. Yüngül hava axını olan və ya dəlikli qabları seçin. Əgər torba istifadə edirsinizsə, üzərində bir neçə kiçik dəlik açın ki, yarpaqlar "nəfəs ala bilsin".

Dondurucuda (buzluqda) saxlama
Uzunmüddətli istifadə üçün cəfərini yuyub tam qurutduqdan sonra xırda doğrayın. Onu kilitli paketlərə (zips) doldurub havasını çıxararaq dondurucuya qoyun. Həmçinin doğranmış cəfərini zeytun yağı ilə qarışdırıb buz qəliblərində dondurmaq da yeməklər üçün çox praktik bir üsuldur.


Lalə Qüdrətova
Milli.Az