Rədd edilmə qorxusundan necə xilas olaq?

"Bəzi insanlar xoşladıqları şəxsə sevgilərini etiraf edə bilmirlər. Çünki rədd edilmək qorxusu yaşayırlar".

Bu sözləri psixoloq Nabat Mirzəyeva Hit.az-a açıqlamasında deyib. 

O, bildirib ki, bir çox insan bunu yaşayır:

"Bunun əsas səbəbi bəzi insanların uşaq vaxtı yaşadıqları rədd edilmələrdir. Bu, zamanla onlarda bir qorxuya çevrilir. Üstəlik, söhbət təkcə sevgi etirafından getmir. 

Hər hansı bir işdə yaşadığımız rədd edilmək, qəlbimizin qırılması və yaxud xəyallarımıza doğru addım atdığımız zaman onların puç olması bu qorxunun yaranmasına səbəb olur. Bəzən də ətrafımızdakı insanlardan "sən bacarmazsan, sən edə bilməzsən" düşüncələrini eşitmək bizə mənfi təsir edir". 

Ekspert qeyd edib ki, belə hallar istər-istəməz bir çox nüansda uğurlarımızın və özgüvənimizin qarşısını alır:

"Bu, istər münasibətlərdə, istərsə də dostluqlarda belədir. Təməl olaraq rədd edilmə qorxusu əsasən uşaqlıqdan, bağçadan, məktəb vaxtından və sonrakı dövrlərdə yaşadığımız nüanslardan qaynaqlanır. 

Ancaq ilk olaraq, bu duyğunu dərk etməliyik. "Nəyə görə qorxuram? Nəyə görə bir insana yaxınlaşmaqdan, fikrimi bildirməkdən və "yox" eşitməkdən qorxuram?" kimi sullara cavab tapmalıyıq. Cavab əsasən rədd edilməkdən qorxmaq olur. Bir çox hallarda da qarşı tərəfin sərt cavab vərəcəyindən çəkinirik". 

Psixoloq diqqətə çatdırıb ki, insanın ən önəmli silahı özü ilə ünsiyyətdir:

"Bu yolla qorxularımızı tapa və daha sonra onlarla üzləşə bilərik. Nəzərə almaq lazımdır ki, hər kəs bizi bəyənməyə bilər. Eyni zamanda, biz də hər kəsi bəyənməyə bilərik. Yəni insanların uyğun gəlməməsi normal haldır. Əslində, biz kiminsə "yox" deməsindən ibarət deyilik. Həyatın davam etdiyi və qarşımıza başqa insanların çıxa biləcəyini unutmayın. Rədd olunanda narahat və ya məyus ola bilərik. Lakin bu, həyatı sonu deyil".

Nabat Mirzəyeva vurğulayıb ki, qarşı tərəfə anidən sevgi etirafı etmək hər zaman doğru seçim olmaya bilər:

"Bəzən bununla bağlı plan hazırlamaq və kiçik addımlar atmaq lazımdır. Məsələn, birbaşa "Səni sevirəm" demək yerinə dostluq qurmaq, münasibəti inkişaf etdirmək və zamanla uyğun addım ata bilərik. Qarşımızdakı insanla münasibəti dərinləşdirə bilərik. Dərinləşmiş münasibətdən sonra vəziyyətə uyğun baxarıq. Birdəfəyə qərar vermək yerinə zamana uyğun qərar vermək daha məqsədəuyğundur. 

Əslində, biz sevgimizi gizlədərək heç nə əldə etmirik. Bildirərək isə özümüzü kəşf edə, duyğularımızı tanıya bilərik. Qəbul edilməmək sadəcə qarşı tərəfin duyğusudur. Biz yalnız onu anlayıb hörmətlə qarşılamalıyıq".

 

Milli.Az