Mükəmməl selfi üçün sadə üsullar: Bəyənmə və şərhlər yağış kimi gələcək - FOTO

Sosial şəbəkələrdə həm bəyənmə, həm də şərh dalğası yaradan selfi çəkmək çətin görünsə də, əslində bir neçə sadə qaydaya əməl etməklə bunu asanlıqla əldə etmək mümkündür.

Milli.Az xəbər verir ki, "Purewow" portalı ilk cəhddəcə gözəl selfi çəkməyin sirlərini bölüşüb.

Düzgün bucaq seçin

Uğurlu selfinin əsas sirri çəkiliş bucağından başlayır. Telefonu altdan tutmaq sifətinizi qeyri-təbii göstərir və yanlış cizgiləri vurğulayır. Ən ideal variant - kameranı göz səviyyəsində və ya bir qədər yuxarıda tutmaqdır. Bu, çənənin daha aydın görünməsini təmin edir, sifəti daha ifadəli və bədəni daha yığcam göstərir.

"0.5" funksiyasını sınaqdan keçirin

Telefon kamerasındakı "0.5" geniş bucaq funksiyası sadəcə trend deyil, həm də effektli nəticə verən üsuldur. 13 mm-lik obyektiv sayəsində görüntü daha dinamik olur, bədən daha incə görünür. Telefonu tutan qol isə estetik bir xətt kimi diqqəti sifətə yönəldir. Sadə poza belə unikal və fərqli görünür.

Kadr bölmələrindən istifadə edin

Kameradakı "grid" (kadr bölməsi) funksiyası foto çəkmə zamanı mükəmməl balans yaratmaq üçün ideal vasitədir. Ekranı doqquz bərabər hissəyə bölən bu funksiya "üçlər qaydası"na əsaslanır. Sifətinizin əsas nöqtələrini - gözləri, gülümsəməni və ya aksesuarları bu kəsişmə nöqtələrinə yerləşdirin. Bu, şəkillərinizə daha peşəkar və estetik görüntü qatacaq.

Tripod istifadə edin

Selfi mütləq əl ilə çəkilməlidir deyə bir qayda yoxdur. Tripod və ya sadə dayaq vasitəsilə telefonunuzu sabitləşdirmək, sizə daha sərbəst poza vermək və yaradıcı çəkiliş imkanları qazandırır. Taymer və ya ardıcıl çəkiliş rejimi ilə bir neçə şəkil çəkərək ən yaxşı nəticəni seçə bilərsiniz.

Sadəliyin içində gözəllik axtarın

Pozanız təbii, baxışınız isə rahat olsun. Kamera qarşısında özünüzü gərməyin. Yaxşı selfi yalnız texniki detallardan yox, həm də daxili rahatlıqdan doğur.

Unutmayın, ən vacib məqam - özünüzü yaxşı hiss etdiyiniz anı çəkib paylaşmaqdır. Çünki əsl cazibə təbii görünməkdədir.

Kənan
Milli.Az