Bu adamın qaraciyəri solda, ürəyi sağdadır - FOTOlar

Qaraciyəri solda, ürəyi sağda - Dünyada cəmi 30 nəfərdə rast gəlinən nadir xəstəliklə mübarizə!

Milli.Az Türkiyə mətbuatına istinadən xəbər verir ki, "Situs inversus"la uğurlu əməliyyat tibb ədəbiyyatına düşüb.

Türkiyənin Dənizli şəhərində yaşayan 29 yaşlı Yiğithan Say daxili orqanlarının güzgü görüntüsündə - yəni tam tərs yerləşdiyi nadir anatomik quruluşa malik olsa da, uğurla mədəkiçiltmə əməliyyatı keçirib. "Situs inversus totalis" adlanan bu vəziyyət dünyada hər 100 min nəfərdən sadəcə birində müşahidə olunur. Yiğithan Say bu anatomik quruluşla bariatrik əməliyyat olan dünya üzrə yalnızca 30 nəfərdən biri olub.

Daxili orqanlarının tərs yerləşdiyini körpə ikən öyrəndiyini bildirən Say bunları deyib:

"29 ildir bu şəkildə həyatımı davam etdirirəm. Uşaqkən bu xəbəri aldığımda anlamamışdım, sonradan fərqinə vardım. Amma həyatımı digər insanlardan fərqsiz, heç bir məhdudiyyət olmadan sürdürürəm. Tək fərqim, orqanlarımın tərs yerləşməsidir. 'Situs inversus totalis' diaqnozu səbəbilə bir çox xəstəxana əməliyyatı həyata keçirməkdə tərəddüd etdi. Lakin cərrah İbrahim Ekiz öz təcrübəsi ilə mənə inam verdi və əməliyyat uğurla keçdi. Əməliyyatdan sonra heç bir ağrı və ya narahatlıq hiss etmədim. Özümü indi çox yaxşı hiss edirəm. Əməliyyatdan sonra bəslənmə vərdişlərim müvəqqəti olaraq dəyişdi. Maye pəhriz, keçid dövrü və bərk qidaya keçid kimi üç mərhələdən ibarət bəslənmə proqramı tətbiq etdim. Hazırda yavaş-yavaş əvvəlki bəslənmə vərdişlərimə dönürəm, amma əvvəlkindən daha az yeyirəm və doyma hissim normaldır".

Əməliyyatı uğurla həyata keçirən Cərrah Op. Dr. İbrahim Ekiz bildirib ki, "Situs inversus totalis" vəziyyəti cərrahi müdaxilələrdə, xüsusilə laparoskopik prosedurlarda ciddi çətinliklər yaradır:

"Yiğithan dünya üzrə hər 100 min nəfərdə bir rast gəlinən nadir bir vəziyyətə malikdir - yəni bütün orqanları güzgü kimi tam tərs yerləşmişdir. Obezite əməliyyatlarını tez-tez edirik, xəstəxanamızda gündə orta hesabla 6-7 belə əməliyyat həyata keçiririk. Amma bu, mənim bu anomaliya ilə ilk təcrübəm idi. Belə nadir anatomiyaya sahib şəxsdə obezite cərrahiyası çox fərqli yanaşma tələb edir. Hər bir addım öncədən iki dəfə planlanmalıdır. Amma doğru komanda və avadanlıqla bu cür xüsusi halları uğurla idarə etmək mümkündür".

Dr. Ekiz, "Situs inversus"lu pasiyentlərdə bariatrik cərrahiyyələrin dünya üzrə yalnız müəyyən ixtisaslaşmış mərkəzlərdə həyata keçirildiyini bildirib və Türkiyədə bu cür əməliyyatların azlığı səbəbilə bu hadisənin daha çox diqqət çəkdiyini vurğulayıb.

Hüseyn
Milli.Az