Gələn ildən "WhatsApp" tamamilə dəyişəcək

"WhatsApp" 1 yanvar tarixindən etibarən qüvvəyə minəcək genişmiqyaslı yeniləmə paketi ilə mesajlaşma və səsli ünsiyyət vərdişlərini ciddi şəkildə dəyişir. Yeniliklər zənglərdən süni intellekt alətlərinə, masaüstü istifadədən status və kanallara qədər platformanın demək olar ki, bütün əsas funksiyalarını əhatə edir.

Milli.Az xəbər verir ki, milyardlarla istifadəçisi olan "WhatsApp" bu addımı ilə Yeni il və bayram dövründə artan istifadəçi aktivliyini daha rahat, interaktiv və funksional hala gətirməyi hədəfləyir.

Buraxılmış zənglər üçün yeni imkan

Ən diqqətçəkən yeniliklərdən biri cavabsız zənglərlə bağlıdır. Artıq zəng etdiyiniz şəxs telefonu açmadıqda, ona birbaşa çat vasitəsilə səsli və ya videomesaj buraxmaq mümkün olacaq. Qarşı tərəf zəngin növünə uyğun olaraq bu mesajı sonradan dinləyə və ya izləyə biləcək. Mütəxəssislər bu funksiyanın klassik səsli poçt xidmətini əvəz edə biləcəyini bildirirlər.

Zənglərdə daha rahat ünsiyyət

Səsli və video zənglər zamanı yeni emoji reaksiyaları və sürətli cavab funksiyaları əlavə edilib. Bu yeniliklər danışanı bölmədən ani reaksiya verməyə imkan yaradır. Qrup videozənglərində isə "aktiv natiq" rejimi tətbiq olunub - danışan şəxs avtomatik olaraq ön plana çıxarılır ki, bu da çoxnəfərlik görüşlərdə diqqətin dağılmasının qarşısını alır.

Süni intellektlə yaradıcı məzmun

Platformada süni intellekt imkanları da genişləndirilib. Meta AI inteqrasiyası sayəsində istifadəçilər artıq bayram kartları, təbrik mesajları və status paylaşımları üçün daha detallı və yüksək keyfiyyətli vizuallar yarada bilirlər. Bundan başqa, yüklənmiş şəkilləri qısa animasiyalara çevirmək də mümkün olacaq.

Masaüstü versiyada rahat idarəetmə

WhatsApp-ın Mac, Windows və veb versiyalarında yeni media paneli istifadəyə verilib. Bu panel vasitəsilə söhbətlərdə paylaşılan bütün sənədlər, şəkillər və linklər bir bölmədə toplanır. Axtarış prosesi sürətlənib, uzun URL-lər avtomatik qısaldılıb və link önizləmələri daha sadə formada təqdim olunur.

Qeyd edək ki, yeni funksiyalar mərhələli şəkildə istifadəyə veriləcək və onların əlçatanlığı istifadəçinin cihazı və regionundan asılı olacaq.

Fidan
Milli.Az