İqtisadiyyat

Yunanıstan Energetika Nazirliyi: "Azərbaycan qazının Avropaya tranziti üçün boru kəmərinin tikintisi sürətlənəcək"

12 Noyabr 2018 18:57

0 Şərh Baxış: 1 243

#İQTİSADİYYAT #AVROPA #QAZ #AZƏRBAYCAN

Avropa Komissiyasının Yunanıstan-Bolqarıstan interkonnektorunun (IGB) tikintisi və istifadəsi üzrə Yunanıstan və Bolqarıstan hökumətlərinin planını təsdiq etməsi tikinti işlərinə başlamaq üçün yol açır.

Milli.Az Trend-ə istinadən bildirir ki, bunu Yunanıstanın Ətraf mühit və energetika naziri Yorqos Statakis deyib.

Nazir qeyd edib ki, IGB enerji ehtiyatlarının tədarükü mənbələrinin şaxələndirilməsinə kömək edəcək və təbii qazı Transadriatik boru kəməri (TAP) vasitəsilə tədarük etməyə imkan yaradacaq:

"Bu, Yunanıstanın Cənub-Şərqi Avropa regionunda enerji qovşağı kimi rolunu artıracaq strateji layihədir. IGB Avropanın enerji bazarının birləşməsinə kömək edəcək".

Qeyd edək ki, Avropa Komissiyası IGB layihəsinin Avropa İttifaqının dövlət yardımı göstərilməsi qaydalarına uyğun olmasını təsdiq edib.

IGB-nin reallaşdırılması üçün investisiyaların həcmi 240 milyon avro təşkil edir.

Milli.Az