Çin maşınları "Mercedes-Benz"i çökdürür

Almaniyanın nəhəng avtomobil istehsalçıları Mercedes-Benz, BMW və Volkswagen bu ilin ilk rübündə kəskin mənfəət itkisi ilə üzləşib. Çin bazarındakı satışların azalması, xərclərin artması və ABŞ-ın yeni gömrük vergiləri bu geriləməyə səbəb olub.

Milli.Az xəbər verir ki, Mercedes-Benz-in mənfəəti 40,7 faiz, BMW-ninki 25,2 faiz, Volkswagen-in isə 37 faiz azalıb. Alman avtomobil mütəxəssisi Ferdinand Dudenhöffer bildirib ki, əsas səbəb Çin bazarındakı zəifləmələrdir. O deyib ki, Alman markaları Çin şirkətləri ilə əməkdaşlıq və texnologiya yatırımları sayəsində 2026-cı ildən etibarən yenidən yüksəlişə keçə bilər.

Digər tərəfdən, ABŞ Prezidenti Donald Trampın tətbiq etdiyi 25 faiz əlavə gömrük vergisi Alman istehsalçılarını daha da sıxışdırır. Bu vəziyyət Alman şirkətlərinin diqqətini Asiya bazarına yönəldə bilər.

Alman avtomobil sənayesini həm də elektrikli maşınlara keçidin yaratdığı yüksək xərclər, proqram problemləri və tez-tez olan geri çağırmalar sıxır. Çıxış yolu kimi kütləvi ixtisarlar və başqa qənaət tədbirləri gündəmdədir.

Çində bir avtomobil üçün işçilik xərci təxminən 600 dollar, Almaniyada isə bu rəqəm 3.300 dollara qədərdir. Bu fərq Alman şirkətlərinin qlobal rəqabətdə vəziyyətini ağırlaşdırır.

Avtomobil sektoru Almaniya üçün hələ də həyati önəm daşıyır: ölkə iqtisadiyyatının 5 faizi, sənaye iş yerlərinin 14 faizi bu sahəyə bağlıdır. Sektorun illik ixracı 290 milyard avro təşkil edir və bu da Almaniyanın ümumi ixracının 17 faizinə bərabərdir.

Çində isə vəziyyət Almanlar üçün daha da çətinləşib. BYD, Nio və Geely kimi yerli brendlər bazara tam nəzarəti ələ almağa başlayıblar. Çin istehsalı olan ucuz və subsidiyalı elektrikli maşınların Avropaya axını isə Alman avtomobil sənayesi üçün daha böyük və uzunmüddətli təhlükə yaradır.

İslam
Milli.Az