Uşaq Filarmoniyasında “Nağılın qonağında” adlı musiqili-poetik konsert keçirilib - FOTO

Azərbaycan Dövlət Uşaq Filarmoniyasında gənc istedadları, müəllimləri, valideynləri və incəsənətsevərləri bir araya gətirən "Nağılın qonağında" adlı musiqili-poetik konsert keçirilib.

Konsertin təşkilatçıları beynəlxalq və respublika müsabiqələri laureatı, caz və estrada ifaçısı, Georgiy Şaroyev adına 35 nömrəli on birillik musiqi məktəbinin fortepiano müəllimi Günel Hacıyeva, həmçinin "Modern Poems" və "Gənc Şairlər" layihələrinin rəhbəri, Azərbaycan Yazıçılar Birliyinin və Dünya Yazıçılar Təşkilatının (WOW) üzvü Lala Həsənova olublar.

Konsert proqramında 35 istedadlı uşaq iştirak edib. Tədbirdə fortepiano və vokal üzrə solo nömrələr, vokal ansambllarının çıxışları, fortepiano duetləri, şeir nümunələri və teatr səhnəcikləri təqdim olunub.

Konsert açılış nitqi ilə müəllimlər Lala Həsənova və Günel Hacıyeva tərəfindən açılıb. Onlar layihəyə göstərdiyi dəstəyə görə Azərbaycan Dövlət Uşaq Filarmoniyasının direktoru Səidə Tağızadəyə, eləcə də valideynlərə və tədbirin qonaqlarına təşəkkürlərini bildiriblər.

Tamaşaçıların xüsusi marağına səbəb olan çıxışlar sırasında məşhur və sevilən cizgi filmlərinin motivləri əsasında hazırlanmış teatr tamaşaları və musiqi nömrələri yer alıb. Balaca iştirakçılar nağıl və cizgi filmi qəhrəmanlarının rəngarəng geyimlərində səhnəyə çıxaraq tədbirə əsl bayram və sehrli ab-hava bəxş ediblər. Onların yaradıcı obrazları sayəsində konsert musiqi və poeziyanı teatr elementləri ilə birləşdirən maraqlı səhnə tamaşasına çevrilib.

Tədbirdə "Gənc Şairlər" ədəbi layihəsinin iştirakçıları və Günel Hacıyevanın şagirdləri çıxış ediblər.

Layihənin əsas məqsədi uşaqların yaradıcılıq potensialının inkişaf etdirilməsi, musiqi və ədəbiyyat sənətinin gənc nəslə sevdirilməsi və təbliğ olunmasıdır. Xüsusilə qeyd edilməlidir ki, layihə xeyriyyəçilik əsasında həyata keçirilir.

Tədbirin sonunda konsert proqramında fəal iştirak edən uşaqlara təşəkkür sertifikatları təqdim olunub.

İnformasiya dəstəyi - Trend.Az, Day.Az, Milli.Az