Bakı Rəqs Çempionatı 2026 uğurla baş tutdu - FOTO

Mərdəkan Mədəniyyət Sarayında keçirilən Bakı Rəqs Çempionatı 2026 ölkənin müxtəlif bölgələrindən yüzlərlə iştirakçını bir araya gətirdi. Çempionat mövsümün ən diqqətçəkən mədəni tədbirlərindən biri olaraq world dances, show dance, müasir və milli rəqs istiqamətlərini eyni səhnədə birləşdirdi.

Səhər saatlarından etibarən səhnədə rəngarəng çıxışlar, yüksək enerji və peşəkar hazırlıq nümayiş olundu. Müxtəlif yaş kateqoriyalarında çıxış edən rəqqaslar öz ustalıqlarını, səhnə mədəniyyətini və orijinal xoreoqrafik quruluşlarını təqdim etdilər. Peşəkar münsiflər heyəti çıxışları beynəlxalq meyarlar əsasında qiymətləndirdi.

Təşkilatçılar qeyd etdilər ki, çempionatın əsas məqsədi rəqs sənətinin inkişafı, gənc istedadların dəstəklənməsi və rəqs kollektivləri arasında yaradıcılıq mübadiləsi üçün platforma yaratmaqdır. Yarışın sonunda qaliblər və laureatlar diplom və xüsusi mükafatlarla təltif olundular.

Tədbir zamanı təşkilatçıların nümayəndəsi, Aziz Azizov çıxış edərək belə qeyd etdi:

"Hər il iştirakçıların səviyyəsinin və gənclərin rəqs sənətinə marağının artdığını görürük. Bakı Rəqs Çempionatı yalnız yarış deyil, yeni istedadların üzə çıxdığı və rəqs mədəniyyətinin inkişaf etdiyi mühüm bir platformadır."

Çempionatın əsas mükafatlarından biri - qalibiyyət sayına görə (8 qələbə) təqdim olunan Qran-pri - Grasiya Dance Club və Ümid Rəqs kollektivlərinə təqdim olundu. Hər iki kollektiv yüksək nəticələrinə görə "Çempionlar Klubu"nda iştirak etmək hüququ qazandı.

Tədbirin sonunda təşkilatçılar növbəti görüşün artıq planlaşdırıldığını bildirərək iştirakçıları qarşıdan gələn Böyük Qafqaz Kuboku yarışmasına dəvət etdilər.

Böyük Qafqaz Kuboku 29 mart 2026-cı il tarixində keçiriləcək və registrasiya artıq açıqdır.

Yeni görüşlərədək - Böyük Qafqaz Kubokunda! 

İnformasiya dəstəyi -  Trend.Az, Day.Az, Milli.Az, Azernews.Az