Mədəniyyət

Mirzə Məhəmməd Zamanbəylinin 165 illik yubileyi qeyd olunacaq

3 Oktyabr 2025 15:57

Baxış: 261

VTB-də yüksək depozit faizleri daha çox qazandırır

#MƏDƏNİYYƏT

5 oktyabr 2025-ci il tarixində, saat 15:00-da görkəmli maarifçi, pedaqoq və xeyriyyəçi Mirzə Məhəmməd Zamanbəylinin 165 illik yubileyinə həsr olunmuş tədbir keçiriləcək. Beynəlxalq Müəllimlər Gününə təsadüf edən tədbir "Maarif işığında: Mirzə Məhəmməd Zamanbəyli" adlanır.

Tədbirdə maarifçilik tariximizin önəmli simalarından biri olan M.M. Zamanbəylinin həyatı və çoxşaxəli fəaliyyəti işıqlandırılacaq. Qori Müəllimlər Seminariyasının ilk məzunlarından olan Zamanbəyli doğulduğu Şahbuz rayonunda şəxsi vəsaiti hesabına məktəb inşa etdirmiş, Naxçıvanda aztəminatlı ailələrə yardım göstərən xeyriyyə cəmiyyətinin əsasını qoymuşdu. O, həmçinin Azərbaycan Demokratik Respublikası dövründə Maarif Şurasının üzvü kimi çıxış etmiş və 1919-cu ildə yaradılmış Bakı Dövlət Universitetinin formalaşmasında fəal iştirak etmişdir.

Tədbirdə pedaqoji elmlər doktoru, professor, Əməkdar müəllim Rüfət Hüseynzadə, pedaqogika elmləri doktoru, professor Zəhra Muradova, Zamanbəyli nəslinin nümayəndələri və Azərbaycan Milli İncəsənət Muzeyinin (AMİM) elmi katibi, sənətşünaslıq üzrə fəlsəfə doktoru Nuranə Səlimli çıxış edəcəklər.

Bundan əlavə, tədbir çərçivəsində AMİM-nin kolleksiyasında qorunan, görkəmli rəssam Bəhruz Kəngərlinin çəkdiyi Mirzə Məhəmməd Zamanbəylinin portreti nümayiş olunacaq və əsər haqqında ətraflı məlumat veriləcək.
Maarif və mədəniyyət tariximizdə silinməz iz qoymuş bu dəyərli şəxsiyyətin irsi ilə yaxından tanış olmaq istəyən hər kəs tədbirə dəvət olunur.

İnformasiya dəstəyi - Trend.Az, Day.Az, Milli.Az