Kriminal

"Görüşüb köhnə söhbəti həll edəcəm" - 20 il əvvəl baş verən hadisənin qisası - Namus cinayəti

13 Aprel 2019 15:20
0 Şərh     Baxış: 2 214
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Bibisini qaçıran şəxsi bıçaqlayan Ağayəhya hakim qarşısına çıxarılıb. O, 20 il əvvəl baş verən hadisənin qisasını qanla alıb.

Milli.Az musavat.com-a istinadən xəbər verir ki, Bakı Ağır Cinayətlər Məhkəməsində qətl törətməkdə təqsirləndirilən 1988-ci il təvəllüdlü Abbasov Ağayəhya Güloğlan oğlunun cinayət işi üzrə məhkəmə iclası davam etdirilib.

Hakim Cavid Hüseynovun sədrliyi ilə məhkəmə iclasında şahidlər ifadə veriblər.

Təqsirləndirilən Ağayəhya Abbasovun qardaşı Fərahim Abbasov dindirilib.

Sərbəst ifadə verən Fərahim Abbasov bildirib ki, qardaşı ilə hadisə günü bir neçə dəfə danışıb.

"Danışanda hiss elədim ki, içkilidir. Qardaşımdan əvvəl tanışlardan biri mənə zəng elədi. Dedi ki, Ağayəhya Rəşidlə görüşəcək. Mən də dedim ki, aydınlaşdırarıq. Sonra Rəşid və qardaşıma zəng edib danışdım. Ağayəhya dedi ki, Rəşidlə görüşüb köhnə söhbəti həll edəcək. Mən də dedim ki, lazım deyil, nə olubsa, keçmişdə qaldı. Rəşidə də dedim ki, lazım deyil, görüşməsin", - deyən şahid bildirib ki, qardaşı "köhnə söhbət" deyəndə illər əvvəl Rəşidlə bibisi arasında olan münasibəti nəzərdə tutub.

Hakim Fərahim Abbasova sual verib ki, illər əvvəl baş verən "köhnə söhbətə" görə düşmənçilik olubmu?

F.Abbasov suala cavabında bildirib ki, hadisə unudulub və mərhum Rəşidlə heç vaxt söz-söhbətləri olmayıb. Hətta onlarla normal münasibətdə olub, məclislərdə və görüşüb.

"Köhnə söhbət"in yenidən necə açılması haqda isə Fərahim Abbasov bunları deyib:

"Ağayəhya toyda idi. Orada necə olubsa, bu söhbət açılıb. Qardaşım da mənə zəng edəndə dedi ki, bu söhbəti Rəşid açıb və birdəfəlik həll eləmək lazımdır. Mən də dəfələrlə bu işdən uzaq durmasını tapşırdım. Amma məni dinləmədi".

Fərahim Abbasov qardaşının üzərində olan bıçaq haqda da suala cavab verib. Bildirib ki, qardaşı heyvandarlıqla məşğul olub və çox zaman cibində bıçaq olub: "Mən şəhərdə olurdum. Rayona gələndə Ağayəhyanı görürdüm. Bıçaq olurdu, amma hadisə baş verən gün onda olan bıçağı heç vaxt üzərində görməmişəm".

Məhkəmədə şahid qismində Mehralı Qasımov da dindirilib.

O, rayonda mağazada satıcı işləydiyini deyib. Məlum olub ki, hadisə günü Ağayəhya bıçağı Qasımovun işlədiyi mağazadan alıb: "Ağayəhyanı tanıyırdım. Gəlib mağazaya baxdı. 80 qəpiklik bıçaq idi. 1 manat verdim, mən də 20 qəpik qaytardım. Sonra da çıxıb getdi".

Şahidin məhkəmədə qorxaraq həyəcanlı şəkildə suallara cavab verməsi hakimin diqqətindən qaçmayıb. Mehralı Qasımov bunu belə izah edib: "İlk dəfədir ki, başıma belə bir iş gəlir. Ona görə də çox həyəcan keçirirəm".

Məhkəməyə şahid qismində Ağayəhyanın digər qardaşı Əşrəf də dəvət olub. Şahid qanunun ona icazə verdiyi imkandan istifadə edərək ifadə verməkdən imtina edib.

Prosesdə hadisənin şahidlərindən, Ağayəhyanı toy məclisindən Rəşidlə görüşə gətirən taksi sürücüsü də dindirilib. O bildirib ki, hadisə baş verəcəyindən xəbərsiz olub. Şahid bildirib ki, mərhumda da silah olub və Ağayəhyaya tuşlayıb.

Taksi sürücüsünün dediklərindən məlum olub ki, hadisədən iki gün sonra mərhumun qardaşı və yaxınları onu görüşə dəvət edərək döyüblər. Ondan hadisə yerində olan üçüncü şəxsin adını soruşmaq istəyiblər. Hətta onun özünün də qətldə əlinin olduğu deyiblər.

Ağayəhya isə istintaqın nəticəsindən narazı olduğunu deyib. Bildirib ki, istintaq elə nəticəyə gəlib ki, guya o, hadisə günü rayonda hər yerdə gəzərək Rəisi axtarıb: "Guya mən qarı cinayətkar, millət kimi qətl planı cızmışam".

Məhkəmə iclası mayın 3-də davam etdiriləcək.

Qqeyd edək ki, qətl hadisəsi ötən ilin iyul ayında Şabran rayonunda baş verib.

Ağayəhya Abbasov 1970-ci il təvəllüdlü Əhmədov Rəşid Sabir oğluna ürək nahiyəsindən 2 dəfə bıçaq zərbəsi vuraraq qətlə yetirib.

İlkin məlumata görə, qətl hadisəsinin baş vermə səbəbi tərəflər arasındakı şəxsi münaqişə olub.

Belə ki, Əhmədov təxminən 20 il əvvəl Ağayəhyanın bibisini qaçırıb və bir müddət birlikdə yaşadıqdan sonra onu atasının evinə qaytarıb.

Sonradan Ağayəhyanın bibisi Cəlilabad rayonuna gəlin köçüb. Müəyyən zamandan sonra bibisinin bu ailə həyatı da uğursuz alınıb və yenidən atasınım evinə qayıdıb.

Bundan sonra Ağayəhyanın ailəsində söz-söhbət yaranıb. O, Rəşid Əhmədovu 20 il bundan əvvəlki hərəkətinə görə cəzalandırmaq qərarına gəlib və onu bıçaqlayıb.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.