Soğanla kartofu eyni yerdə saxlamayın - Diqqət!

Soğan və kartofun birlikdə saxlanması onların keyfiyyətinə ciddi zərər vurur.

Milli.Az xəbər verir ki, mütəxəssislər səbəbi etilen qazı və nəmlik balansının pozulması ilə izah edir.

Qida mütəxəssisləri və kənd təsərrüfatı texnoloqları xəbərdarlıq edirlər ki, ev təsərrüfatlarında ən çox edilən saxlanma səhvlərindən biri kartof və soğanın eyni yerdə qoyulmasıdır.

Məlumata görə, soğan saxlanma zamanı etilen qazı ifraz edir. Bu qaz bitkilərdə bioloji yetişmə prosesini sürətləndirən təbii hormon rolunu oynayır. ABŞ Kənd Təsərrüfatı Departamentinin (USDA) və bir sıra ərzaq təhlükəsizliyi laboratoriyalarının araşdırmalarına əsasən, etilen qazına həssas tərəvəzlər siyahısında kartof da yer alır. Etilenlə təmas kartofun cücərməsini sürətləndirir, bu isə yumrunun yumşalmasına, nişastanın parçalanmasına və məhsulun daha tez xarab olmasına səbəb olur.

Bundan başqa, kartofun nisbətən yüksək rütubətliliyi soğana mənfi təsir göstərir. Soğan quru və havalı mühit tələb edir. Rütubət artdıqda soğanın qabıqları sürətlə yumşalır, göbələk və bakteriya inkişafı üçün əlverişli şərait yaranır, nəticədə tərəvəz daha tez çürüyür. Qida saxlanması üzrə beynəlxalq tövsiyələrə əsasən, soğan saxlanılan məkanda hava dövranı mütləq təmin edilməlidir, kartof isə qaranlıq və sərin yerdə qalmalıdır. Bu iki tərəvəz eyni yerdə saxlananda həm temperatur, həm işıq, həm də nəmlik balansı pozulur.

Ekspertlər bildirirlər ki, soğan və kartofun "bir-birinə zərər verdiyi" haqda yayılan məişət müşahidələri elmi dəlillərlə də təsdiqini tapır. Buna görə də qida təhlükəsizliyi üzrə tövsiyələrdə bu iki məhsulun mütləq ayrı saxlanılması vurğulanır. Soğan tor və ya kağız kisələrdə quru yerdə, kartof isə qaranlıq və sərin məkanda saxlanmalıdır.

Mütəxəssislər əlavə edirlər ki, düzgün saxlanma tələblərinə əməl olunarsa, həm kartof, həm də soğanın istifadə müddəti bir neçə ay uzadıla bilər. Ailə təsərrüfatlarında isə yanlış saxlanma səbəbindən tərəvəzlərin 10-25 faizinə qədər hissəsinin zamanından əvvəl korlandığı qeyd edilir.

İsmayıl
Milli.Az