Ölkə

Tələbə qızlar suşidən yox, bu qidadan zəhərləniblər? - AÇIQLAMA

22 Noyabr 2019 15:01
11 Şərh     Baxış: 48 074
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Xəbər verdiyimiz kimi, ötən gün Bakı Dövlət Universietinin 2 saylı yataqxanasında universitetin tələbələri - 1999-cu il təvəllüdlü Xasmətova Şəkər Faiq qızı, 1998-ci il təvəllüdlü Quliyeva Dilrubə və İbadova Həmidə qidadan zəhərlənib. Həmidə ilə Dilrubə Kliniki Tibbi Mərkəzə yerləşdirilsə də, Şəkər hadisə yerində keçinib.

Milli.Az xəbər verir ki, qafqazinfo-ya açıqlama verən Dilrubə Quliyevanın bacısı Firuzə Quliyeva hadisənin bəzi təfərrüatlarını açıqlayıb. O, əvvəlcə bəzi KİV-də, eləcə də sosial şəbəkələrdə qızların suşidən zəhərlənməsi barədə yayılan xəbəri təkzib edib:

"Qızlar suşidən zəhərlənməyiblər. Bacım həmin axşam anamla telefonda danışanda yemək bişirirdilər. Tam dəqiq bilməsək də, deyilənə görə, kartof qızartması, xiyar turşusu və mandarin yeyiblər".

Bacısının sözlərinə görə, Dilrubə yataqxanada davamlı olaraq qalmırdı.

O, vəziyyətin bu həddə çatmasında təcili tibbi yardım əməkdaşlarını səhlənkarlığa yol verməkdə ittiham edib: "Bacım yataqxanada qeydiyyatda olsa da, orada hər gün qalmırdı. Əmim Rusiyada olduğu üçün, onun yoldaşının yanında qalırdı. Sadəcə, kəsiri olan günlər yataqxanada qalırdı ki, universitetə daha tez çatsın. Hadisə baş verən gün də o günlərdən biri idi. Bacımın kəsiri varıydı. Qızlar isə axşam qidadan zəhərləniblər. Gecə təcili tibbi yardım gəlib ilkin yardım göstərib və onlara dimedrol-analgin vurub. Bildiyimiz kimi, dimedrol da yuxu gətirir. Yatmamışdan əvvəl yataqxanada qalan Tofiqə adlı qıza deyiblər ki, səhər bizi yuxudan oyadarsan, gecikmərik. Dilrubənin kəsir dərsi var idi, ora getməli idi. Qız səhər gəlib görüb ki, Şəkər keçinib. Dilrubə ilə Həmidənin ağzından köpük axır. Yenidən təcili tibbi yardım çağırıblar, o da gec gəlib. Bir saatdan sonra qızları təcili tibbi yardım maşını ilə "Semaşko"ya çatdırıblar. Bizə də səhər zəng edib məlumat verdilər".

Firuzə Quliyeva hazırda bacısı ilə Həmidənin durumunun yaxşı olduğunu bildirib: "Valideynlərim bacımın yanındadırlar. Onunla görüşüb danışıblar. Həm bacımın, həm də Həmidənin durumu yaxşıdır".

Eyni zamanda, bununla bağlı "Leykemiya ilə mübarizə" İctimai Birliyinin sədri Mehriban Bağırova sonxeber.az-a bildirib ki, hazırda hər iki qızın vəziyyəti yaxşıdır: "Axşam zəhərlənən qızlardan birinin də öldüyü xəbəri yayılmışdı. Bizim fəallar dərhal xəstəxanaya getdilər. Yayılan ölüm xəbərin yalnış olduğu ortaya çıxdı. Qızlar suşini 3 gün öncə yeyiblər. Qızlar axşam mağazadan aldıqları "Rollton" supunu içiblər. Xəstələrin yanına bizi buraxmırlar. Həmidənın anası bu gün Bakıya gəlir. Dünən Həmidənin yanında xalası ilə dayısı olub. Bizdə mütəmadı qızlara baş çəkirik".

Qeyd edək ki, zəhərlənən qızlardan Həmidə İbadova Leykemiya ilə Mübarizə İctimai Birliyi adlı yerdə könüllü müəllim vəzifəsində çalışır.

Baş verən hadisə ilə bağlı Bakı Şəhər Prokurorluğu tərəfindən cinayət işi açılıb.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.