Ölkə

Agentlik sədri: "Hotelçilik sahəsində xidmət səviyyəsinin keyfiyyətini artırmaq əsas hədəflərdəndir"

4 Sentyabr 2019 15:00

0 Şərh Baxış: 540

#CƏMİYYƏT

Hotelçilik sahəsində mövcud potensialı inkişaf etdirmək və xidmət səviyyəsinin keyfiyyətini artırmaq Dövlət Turizm Agentliyinin əsas hədəflərindəndir.

Milli.Az Trend-ə istinadən xəbər verir ki, bunu Agentliyin sədri Fuad Nağıyev Azərbaycanda səfərdə olan Avropa Hotellər, Restoranlar və Kafelər Assosiasiyasının ("HOTREC") prezidenti Jens Zimmer Kristensenlə görüşündə deyib.

Azərbaycan Turizm Bürosunun baş icraçı direktoru Florian Zenqstşmid ölkədə hotelçiliyin inkişafı üçün mühüm addımlar atıldığını söyləyib. O, bunun tərkib hissəsi olaraq ötən il Azərbaycan Hotel Assosiasiyasının yaradıldığını bildirib.

Görüş zamanı Azərbaycanın turizm imkanları, hotelçilik, bütövlükdə turizm sənayesinin inkişafı barədə müzakirələr aparılıb.

Müzakirələrdə qonaqpərvərlik sənayesində beynəlxalq təcrübənin öyrənilməsi, eləcə də təcrübə mübadiləsinin aparılmasının vacib məqamlardan olduğu diqqətə çatdırılıb.

Qeyd edək ki, Avropa Hotellər, Restoranlar və Kafelər Assosiasiyasının ("HOTREC") prezidenti Jens Zimmer Kristensen sentyabrın 3-də Bakıda start götürən "İntour" sammitinə qatılıb.

Təşkilat sədri bu gün Azərbaycan Qida Təhlükəsizliyi Agentliyi və Ekologiya və Təbii Sərvətlər Nazirliyində də görüşlərdə iştirak edəcək, eyni zamanda hotelçilik sənayesinin nümayəndələri ilə bir araya gələcək.

Milli.Az