Bakıda piknikə gedən 2 uşağı vuran avtobus sürücüsü tutuldu - YENİLƏNİB

14:59

Abşeron rayonunun polis və prokurorluq əməkdaşları tərəfindən həyata keçirilmiş təxirəsalınmaz istintaq və əməliyyat-axtarış tədbirləri nəticəsində rayon ərazisində azyaşlıların zərər çəkdiyi yol nəqliyyat hadisəsini törətməkdə şübhəli bilinən sürücü tutularaq istintaqa cəlb edilib.

Belə ki, iyunun 1-də Abşeron rayonu, Mehdiabad qəsəbəsi ərazisində Elnur Şiriyevin 108A nömrəli marşrut xətti üzrə idarə etdiyi "Daewoo" markalı, 10-TG-550 dövlət qeydiyyat nişanlı sərnişin avtobusu ilə yolu keçən piyadalar - 2012-ci il təvəllüdlü Sevgi Quliyeva və Nahid Babayevi vurub onlara müxtəlif dərəcəli bədən xəsarətləri yetirməsi faktına görə rayon Polis İdarəsinin İstintaq Şöbəsində Cinayət Məcəlləsinin 263.1-ci (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan zərərçəkmiş şəxsin sağlamlığına az ağır zərər vurulmasına səbəb olduqda) maddəsi ilə cinayət işi başlanıb.

Milli.Az xəbər verir ki, cinayət işi üzrə hadisə yerinə baxış keçirilib, zəruri ekspertizalar təyin olunub və digər təxirəsalınmaz istintaq hərəkətləri həyata keçirilib.

Aparılmış istintaqla hadisənin Elnur Şiriyev tərəfindən yol hərəkəti və nəqliyyat
vasitələrinin istismarı qaydalarını kobud surətdə pozaraq törədilməsinə əsaslı şübhələr müəyyən edilib.

İstintaq-əməliyyat tədbirləri nəticəsində E.Şiriyev şübhəli şəxs qismində tutularaq müdafiəçi ilə təmin edilməklə dindirilib.
Hazırda iş üzrə zəruri istintaq tədbirləri davam etdirilir.

---------
12:01

"Uşaqların Beynəlxalq Müdafiəsi Günü"ndə Bakıda avtobus 2 uşağı vurub.

Milli.Az xəbər verir ki, Səhiyyə Nazirliyindən qafqazinfo-ya daxil olan məlumata görə, hadisə Mehdiabad qəsəbəsində baş verib.

Belə ki, 108 nömrəli marşrut avtobusu yolu keçmək istəyən 8 yaşlı bir qız, bir oğlanı vurub.

Uşaqlar xəstəxanaya aparılıb, vəziyyətləri orta-ağırdır.

Qeyd edək ki, hadisə uşaqlar müəllimləri ilə birlikdə piknik etməyə gedərkən baş verib.

Milli.Az