Ölkə

Bakı metrosunda süni havalandırmanın keyfiyyəti bir neçə dəfə artırılacaq

13 Aprel 2019 11:22
2 Şərh     Baxış: 878
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Bakı metrosunda istismar müddətini başa vurmuş 7 ventilyator bu il ərzində yenisi ilə əvəz ediləcək.

Milli.Az Trend-ə istinadən xəbər verir ki, 2018-ci ildə dünyanın aparıcı şirkətlərinin məhsulları arasında aparılmış monitorinqə əsasən, ən sərfəli, səmərəli və Bakı Metropoliteninin bütün tələblərini nəzərə alan variant kimi, Rusiyanın "Artyomovsk Maşınqayırma Zavodu "Ventprom" Səhmdar Cəmiyyəti seçilərək müqavilə imzalanmışdı.

Ventilyatorlardan 4-ü "VOM 24R", 3-ü isə "VOM 20" tiplidir. Onların gücü müvafiq olaraq 75 və 55 kVt, məhsuldarlığı, texniki göstəriciləri Bakı Metropoliteninin istismar şəraitinə tam uyğun və qənaətbəxşdir. Məhsuldarlığı ilə yanaşı, yeni ventilyatorların faydalı iş əmsalı, faydalı gücü, titrəyiş və səs-küy həddi və s. texniki göstəriciləri tələb olunan standartlara cavab verir.

Cari ilin may ayına qədər Bakıya gətirilməli olan 7 ventilyatordan ikisinin artıq quraşdırılması üzrə işlər başlayıb.

Yeni ventilyatorlar tunellərdə süni havalandırmanın keyfiyyətini bir neçə dəfə artıracaq. Əvvəlki ventilyatorlar 20-30 kub.m/saniyə məhsuldarlıqla işləyirdisə, yeni nümunələrin havalandırma imkanı 60-70 kub.m/saniyədir.

Bundan savayı, 2019-cu il ərzində tunel və stansiyaların təbii havalandırılması istiqamətində də mühüm işlərə başlanılacaq. Bu məqsədlə dünyanın qabaqcıl istehsalçılarının məhsulları araşdırıb, tətbiqinin mümkünlüyü, səmərəsi və digər texniki detalları öyrənilib.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.