Ölkə

Sevgililər Günündə evlənənlərin sayı - AZƏRBAYCANDA

14 Fevral 2019 09:33
1 Şərh     Baxış: 2 334

Dünyanın bir çox ölkələrində cütlüklər öz sevgilərini daha bariz şəkildə nümayiş etdirmək üçün nikahlarını məhz Sevgililər Günü kimi qəbul edilmiş 14 fevral - Müqəddəs Valentin Günündə bağlayırlar.

Milli.Az Trend-ə istinadən xəbər verir ki, Müqəddəs Valentin Günündə nikah bağlayanların sayına görə Hollandiya xüsusi yer tutur. 14 fevral həftənin cümə gününə təsadüf etdikdə isə həmin gün toy etmək istəyənlərin sayı daha çox olur. Məsələn, 2014-cü ildə Müqəddəs Valentin Günü həftənin cümə gününə təsadüf edib. Həmin il Hollandiyada 678 cütlük ailə qurub ki, bu say da fevral ayının digər cümə günlərində evlənənlərin orta sayından demək olar ki, 5 dəfə çox olub.

Moskva Vətəndaşlıq Vəziyyəti Aktlarının Qeydiyyatı İdarəsinin rəisi Yelena Yefremova deyib ki, bu il 14 fevralda yalnız Moskvada 288 yeni ailə qurulacaq. Ötən il bu münasibətlə 325 ərizə qəbul edilmişdi.

Azərbaycanda Müqəddəs Valentin Gününün keçirilməsi ənənəsi çox geniş yayılmasa da, ölkəmizdə bu günün keçirilməsində maraqlı olan iş adamları ilə yanaşı, bu günün xüsusi şəkildə qeyd edilməsinə çalışan gənclər də var.

Dövlət Statistika Komitəsindən Trend-in sorğusuna cavab olaraq bildirilib ki, son 5 il ərzində fevral ayında ən çox evlilik sayı 2014-cü ildə qeydə alınıb. Həmin ildə bağlanmış 84 912 nikahın 5894-ü fevral ayının payına düşüb.

2015-ci ildə bağlanmış 68 773 nikahın 5462-i, 2016-cı ildə 66 771 nikahın 4445-i, 2017-ci ildə 62 923 nikahın 4174-ü, 2018-ci ildə 62 484 nikahın 3736-sı fevral ayında qeydə alınıb.

Ədliyyə Nazirliyindən Trend-in sorğusuna cavab olaraq bildirilib ki, 2017-ci il fevralın 14-də Azərbaycanda 277, 2018-ci ildə isə 212 nəfər nikaha daxil olub.

Qeyd edək ki, statistik məlumatlarda fevralın 14-də evlənənlərin nikah günlərini məhz Müqəddəs Valentin Gününə görə təyin etdikləri açıqlanmasa da, onların arasında nikahlarını məhz həmin gündə bağlamaq istəyən gənclərin olması da istisna edilmir.

Azərbaycan Sosioloqlar Birliyinin icraçı direktoru, Aktual Elmi-Sosioloji Araşdırmalar Mərkəzinin rəhbəri, sosiologiya elmləri doktoru, dosent Əbülfəz Süleymanlı Trend-ə bildirib ki, Azərbaycanda Müqəddəs Valentin Gününün keçirilməsi düzgün deyil və bunun üçün geniş şəkildə təbliğat aparılmalıdır.

Sosioloqun sözlərinə görə, bu məsələdə KİV-lər, internet saytları xüsusi fəallıq göstərməlidirlər:

"Müqəddəs Valentin Gününün kütləviləşməsində KİV-lərin, o cümlədən internet saytlarının xüsusi rolu var. Onlar bunu geniş şəkildə təbliğ etdikləri üçün həmin gün istər-istəməz kütləviləşir və insanların ona marağı artır".

14 fevral - Müqəddəs Valentin Gününün son illərdə Azərbaycan cəmiyyətində də geniş qeyd edilməsindən təəssüflənən sosioloq əlavə edib ki, milli və dini baxımdan bu günün Azərbaycanın mədəniyyəti, adət-ənənələri, İslam dini ilə heç bir bağlılığı yoxdur: "Həmin gün xristian dünyasında baş vermiş hadisənin təcəssümüdür. Azərbaycanda bir qisim insanlar bu günü kor-koranə şəkildə qeyd edirlər".

Milli.Az

loading...

Şərh yaz:

1 Şərh:

  • Anonim
    g · 14 Fevral 12:5720

    azad olkede yasamiriq??? kim isteyer qeyd eder kim istemez qeyd etmez.size ne

    Cavab yaz

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.