11:55
Bakıda gecə klubunda 5 nəfərin bıçaqlanması ilə nəticələnən hadisə ilə bağlı 1 nəfər saxlanılıb.
Milli.Az bildirir ki, Trend-in hüquq-mühafizə orqanlarından əldə etdiyi məlumata görə, hadisə ilə bağlı keçirilən əməliyyat nəticəsində gecə klubunda 5 nəfəri bıçaqlamaqda təqsirləndirilən Yağmur Amanov saxlanılıb.
Araşdırmalar nəticəsində məlum olub ki, Y.Amanov Türkmənistan vətəndaşıdır.
Faktla bağlı Nizami rayon Prokurorluğunda Cinayət Məcəlləsinin 221-ci (xuliqanlıq) maddəsi ilə cinayət işi başlanılıb.
Qeyd edək ki, yanvarın 14-də gecə saatlarında Bakının Nizami rayonu, 8-ci kilometr qəsəbəsindəki gecə klublarından birində baş vermiş dava nəticəsində 5 nəfər bıçaqlanıb. Hadisə nəticəsində 30 yaşlı Əsədova Esmira Telman qızı, 1990-cı il təvəllüdlü Mirzəyeva Türkanə Teymur qızı və 1987-ci il təvəllüdlü Eyvazov Əfqan Həsrət oğlu bıçaq xəsarətləri ilə 3 saylı Şəhər Klinik Xəstəxanasına, daha 2 nəfər isə özəl klinikalardan birinə yerləşdirilib.
----------
09:55
Gecə saatlarında paytaxtda gənclər arasında kütləvi dava olub.
Milli.Az APA-ya istinadən xəbər verir ki, Bakının Nizami rayonu, 8-ci kilometr qəsəbəsindəki gecə klublarından birində qeydə alınmış dava zamanı 5 nəfərə bıçaqla xəsarət yetirilib.
Mübahisənin qız üstündə yarandığı deyilir. Nəticədə gənclərin mübahisəsi əlbəyaxa davaya çevrilib. Bıçaq xəsarətləri alanlar isə 30 yaşlı Əsədova Esmira Telman qızı, 1990-cı il təvəllüdlü Mirzəyeva Türkanə Teymur qızı və 1987-ci il təvəllüdlü Eyvazov Əfqan Həsrət oğludur. Yaralılar 3 saylı Şəhər Klinik Xəstəxanasına, daha 2 nəfər isə özəl klinikalardan birinə çatdırılıb.
İnsidentin təfərrüatlarını Nizami RPİ-nin istintaqçıları araşdırır. Adları açıqlanmasa da, hadisədə artıq 3 nəfərin saxlanıldığı bildirilir.
Milli.Az