Ölkə

Ana iki qızına görə müraciət etdi - Yazıq deyillərmi?

22 Sentyabr 2017 11:43
3 Şərh     Baxış: 4 623

Zərdab rayonu, Pərvanlı kənd orta məktəbinin ibtidai sinif müəllimi Gülnisə Məmmədova Milli.Az-a ünvanladığı məktub vasitəsilə vətənpərvər, xeyirxah insanlara və aidiyyəti qurumlara müraciət edib:

"Hazırda 2 qız övladım tələbədir. Onlardan biri Azərbaycan Dövlət Pedoqoji Universiteti, digəri Bakı Dövlət Universitetində təhsil alır. Lakin imkansızlıq ucbatından artıq onları oxutdura bilmirəm. Qızımın biri 3-cü kursda, digəri isə 1-ci kursda təhsil alır. Böyük qızım 501 balla Azərbaycan Dövlət Pedoqoji Universitetinin filologiya fakültəsinə daxil olub. Digər qızım isə 478 balla Bakı Dövlət Universitetinin "Coğrafiya" fakültəsinə daxil olub.

Ümumilikdə 4 övladım var, digər 2 uşağım isə məktəblidir. Övladlarımı oxuda bilməməyimin səbəbi yoldaşımın ağır xəstəlik səbəbindən işləməməsidir. Əvvəl ustalıq edirdi, mən isə məktəbdə müəllim işləyərək onların ehtiyaclarını ödəyirdik. Lakin hazırda, demək olar, gözləri görmür, işləyə bilmir. İndi qalmışam çıxılmaz vəziyyətdə. Qızlarım mənə deyirlər: "Mama, universitetə getməyək, oxumuruq". Bakıda ucuz qiymətə ev tapmaq olmur. Mən əsas kirayə puluna görə narahatam. Hazırda hər ay hər biri üçün 100 manat kirayə pulu verməliyəm. Bu da edir 200 manat. Fikirləşirəm ki, hər ay 200 manat onların ev kirayəsinə verə bilməyəcəyəm. Bir yandan da yoldaşımın müalicəsi üçün kredit götürmüşük. Mənim aylıq maaşım 286 manatdır. Mən bu pulla onları oxuda bilmirəm.
Onlar qalacaq yerlə - yataqxana ilə təmin olunsalar, pulsuz bir yerdə qalsalar, birtəhər də olsa, oxudaram. Əsas ev problemidir. Sentyabr ayının kirayə pulunu vermişdim. Oktyabrın 5-də yenidən 200 manat ödənməlidir. Buna isə imkan yoxdur. Məcburam onların təhsilini yarımçıq qoyam, amma bunu istəmirəm. Onların ən böyük arzusu oxumaqdır. Çoxları deyir ki, oxutma, imkanın yoxdur, yarımçıq saxla. Amma mən deyirəm ki, nəyə görə oxutmayım, yazıq deyillərmi? Ödənişli fakültəyə girməyiblər axı, ödənişsizdir. Onların oxumasını istəyirəm, başqa heç nə. Kimsə onlara kömək olsun. Aidiyyəti orqanlardan, vətənpərvər, xeyirxah, imkanlı insanlardan, sadəcə, qızlarımın oxumasına kömək olmalarını xahiş edirəm!"

Ailəyə yardım etmək istəyənlər (051) 4376374 nömrəli telefonla əlaqə saxlaya bilərlər.

Zərif Nisə
Milli.Az

Digər maraqlı xəbərlər Milli.Az-ın Facebook səhifəsində

loading...

Şərh yaz:

3 Şərh:

  • Anonim
    aea · 22 Sentyabr 2017 12:1833

    Hər bir çətinlikdən çıxış yolu var....qiyabi oxusunlar.... və işə düzəlsinlər. Həm evin, həm də öz ehtiyaclarını ödəsinlər..... Mən də kasıb ailədən olmuşam, atam rəhmətə gedib. hər şeyə özüm nail olmuşam. işləmişəm oxumuşam. ailəmə kömək olmuşam. heç kimə möhtac olmaq, heç kimdən kömək istəmək istəməmişəm.... Allah hərənin özünə yetirsin və kömək olsun.....

    Cavab yaz
  • Anonim
    Niko · 22 Sentyabr 2017 14:5800

    Əvvəla, qiyabi da oxuyası olsalar belə, arada mütləq Bakıya gəlməli, bir müddət paytaxtda qalmalıdırlar. Bunun üçün isə yenə də kirayə ev tapmalı olacaqlar. Onda lap çətin olacaq. Kim qız uşaqlarına 1-2 aylıq ev kirayə verər? İkincisi, tutaq ki, Bakıda işləyib, burda qaldılar və qiyabi şəkildə oxumağa davam etdilər. Kim heç bir təcrübəsi olmayan tələbə qızları elə bir stabil işə götürər ki, o arada maaş ala-ala işə gəlməsin? Axı onlar qiyabi oxusalar, yenə də arada dərslərə və imtahanlara getməlidirlər. Hələ üstəlik, iş stabil olmalıdır. Çünki stabil iş olmasa, qızların gəlriləri də deməli, stabil olmayacaq. O zaman ev kirayəsini necə verəcəklər? Yəni bu cəmiyyətin iki qız uşağını oxutmaq üçün üst-üstə cəmi 300-500 manata gücü çatmayacaq?!

    Cavab yaz
  • Anonim
    5678 · 22 Sentyabr 2017 15:0000

    Kömək istəmək istəməmək çox nümunəvi və tərifə layiq bir şeydi amma pulsuz yataqxanalar işləməlidir..nəzarət altında, bu və ya digər formada.. ƏGƏR deyirik ki "Təhsil önəm verilən sahələrdən biridir". Sakinsiz və xeyirsiz binalarda şəhərdə çox olmalıdır...

    Cavab yaz

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.