Ölkə

Bakıda prodüser xəstə uşağa kömək adı ilə dələduzluq etdi - FOTO

19 Sentyabr 2017 11:25
1 Şərh     Baxış: 2 560
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Prodüser Zaur Məmmədov tanınmış müğənnilərin adından istifadə edərək dələduzluq edib.

Milli.Az qafqazinfo-ya istinadən xəbər verir ki, o, ağır xəstəlikdən əziyyət çəkən 3 yaşlı körpənin müalicəsinə pul toplamaq üçün tanınmışların iştirakı ilə konsert təşkil edəcəyini vəd verərək Bakı sakini Nuriyyə Quliyevanın pulunu mənimsəyib.  

Şikayətçi N.Quliyeva bildirib ki, sosial şəbəkələrdə Fidan Nəzərova adlı xanımın 3 yaşlı övladı Nəzərova Zeynəb Nəsimi qızının aşağı ətraflarının inkişafdan qalması nəticəsində ağır durumda olması və körpənin müalicəsinin yalnız xarici ölkələrdən birində mümkün olması barədə statusunu oxuyub:

"Bu statusu oxuyandan sonra çarəsiz durumda olan anaya və ağır xəstəlikdən əziyyət çəkən körpəyə necə kömək edə biləcəyimizlə bağlı müxtəlif variantları götür-qoy etməyə başladıq. Uşağın müalicəsinə kömək etmək üçün tanınmış müğənnilərin iştirakı ilə xeyriyyə konsertinin keçirilməsi variantı üzərində dayandıq".

N.Quliyevanın sözlərinə görə, konserti təşkil etmək etmək üçün əvvəllər bu tipli tədbirlər keçirdiyinə dair paylaşımlarını gördüyü, özünü müğənni İradə Mehrinin prodüseri kimi təqdim edən Zaur Məmmədovdan kömək istəyib: 

"Zaur Məmmədov bu sahədə böyük təcrübəsinin olduğunu, bir müddət əvvəl müalicə puluna ehtiyacı olan bir uşaq üçün Azərbaycanın tanınmış müğənnilərinin iştirakı ilə konsert təşkil etdiyini və qısa müddətdə 78.000 manat pul topladığını söylədi. Açığı onun belə deməsi məni sevindirdi və ümidləndirdi. Balaca Zeynəb üçün xeyriyyə konserti təşkil edəcəyimizi uşağın anasına bildirdim. O, bu xəbərə çox sevindi və ümidinin yalnız bu aksiyadan toplanacaq vəsaitə olduğunu söylədi.

Bundan sonra Zaur Məmmədovla xeyriyyə konsertinin təşkili ilə bağlı müzakirələr apardıq. Ölkənin tanınmış müğənniləri və aparıcı televiziya rəhbərləri ilə yaxşı münasibətləri olduğunu, xeyriyyə aksiyasıının yüksək səviyyədə keçəcəyini, hətta televiziyada geniş işıqlandırılacağını bildirdi. Zaur Məmmədov xeyriyyə aksiyası üçün avadanlıqların icarəsi adı ilə məndən əvvəlcə 400 manat pul aldı. Bir neçə gündən sonra əlavə 600 manat da istədi. 

Dedi ki, daha çox pul yığmaq üçün bu işə könüllülər cəlb olunmalıdır və həmin əlavə vəsait də onlara veriləcək. Bu zaman mən 300 manat verə biləcəyimi bildirdim və ona bu məbləği ödədim.İyulun əvvəlinə qədər ondan heç bir xəbər çıxmadı. Zaur Məmmədovla əlaqə saxlayıb vəziyyətin necə olduğunu, konsertin nə zaman baş tutacağını xəbər aldım. Çünki uşağın vəziyyəti günü-gündən ağırlaşırdı. O, könüllülər qrupunun artıq 2000 manatdan çox pul yığdıqlarını bildirdi. Mən ona uşağın valideynləri ilə görüşüb yığılan məbləği təhvil verməyi təklif etdikdə daha çox vəsait üçün bir neçə gün daha gözləmək lazım olduğunu söylədi. Lakin daha sonra onun nömrələrinə zəng çatmadı.

Daha sonra isə günlərlə yazdıqlarıma cavab vermirdi. Cavab verəndə də deyirdi ki, xeyriyyə konsertinə hazırlıq görülür, artıq tanınmış müğənnilər Röya, Faiq Ağayev, Aygün Kazımova, Nadir Qafarzadə, Günay İbrahimli, Flora Kərimova, Elariz və başqaları ilə görüşüb danışıb, konsertdə iştirak etmələrinə razılıqlarını alıb. Dediyinə görə, digər prodüsser Təranə Səmədovanı da bu işə cəlb etmişdi. 

Üstündən aylar keçsə də Zaur Məmmədov xeyriyyə konsertini təşkil etmədi. Gah dedi ki, müğənnilər deyir ki, bir az gözləyin, gah dedi ki, özünün səhhətində problem yaranıb, təcili yardımla xəstəxanaya aparıblar, gah dedi ki, anası rəhmətə gedib. Amma bunların hamısı bəhanə idi. Eşitdiyimə görə o, başqa adamları da aldadıb. Son aylarda 4-5 dəfə telefon nömrəsini dəyişib. İndi də qaçıb gizlənir. 

Beləliklə, Zaur Məmmədov nə xəstə uşağın müalicəsinə kömək üçün konsert təşkil etdi, nə də aldığı  pulu qaytardı". 

"Qafqazinfo" dələduzluqda ittiham olunan Zaur Məmmədovla əlaqə saxlamağa cəhd edib. Prodüserin istifadə etdiyi 6 telefon nömrələrinin heç birinə zəng çatmayıb. 

Bundan əlavə, şikayətdə adı hallanan Təranə Səmədova isə bu məsələdən xəbərsiz olduğunu, ittiham olunan şəxsin onun adından istifadə etdiyini söyləyib: 

"Bəlkə də, həmin şəxsi iki iul bundan qabaq görmüşəm. Sizin dediyiniz məsələdən,adı çəkilən konsert barədə heç bir məlumatım yoxdur".

Z. Məmmədov özünü prodüseri kimi təqdim etdiyi İradə Mehrinin də mövqeyini öyrənmək istədik. İfaçının meneceri Yusif Qasımov yanvar ayından etibarən müğənni ilə çalışdığını bildirib:

"Zaur bəylə İradə xanımın heç bir əlaqəsi yoxdur.Sözügedən məsələdən bixəbərik".  

Milli.Az

Digər maraqlı xəbərlər Milli.Az-ın Facebook səhifəsində

Məqaləyə dair fotomateriallar:

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.