Azərbaycanı ilan ilində nələr gözləyir? - Zirəddin açıqladı

Hər ilin başlanğıcında insanları, əsas da astrologiya həvəskarlarını həmin ilin necə keçəcəyi maraqlandırır.  Məlumdur ki, qarşıdan gələn ilin simvolu ilandır.

Bəs bu il zəhərlidir, ya zərərsiz? Azərbaycanı İlan ilində nələr gözləyir?

Milli.Az xəbər verir ki, Rusiyada yaşayan həmyerlimiz, klinik psixoloq Zirəddin Rzayev İlan ilinin xarakterik xüsusiyyətlərini  Yenisabah.az-a açıqlayıb və Azərbaycanla bağlı bir neçə nüansa toxunub:

"2025-ci ilə qədəm qoyan ilan olduqca müdrik və zəhərlidir. İlan var ki, zəhəri yoxdur, öz şikarını boğaraq öldürür. İlan da var ki, sancır, zəhərinin gücü ilə öldürür. Bu ilin ilanı isə məhz zəhəri ilə şikarını ovlayan ilan ilidir. O, yüz ölçür, min biçir və sonra hücuma keçir. O aqressiv deyil, zəruri ehtiyacını ödəmək və təhlükə anında özünü müdafiə etmək üçün qərar qəbul edir.

2025-ci il yeni idealar ilidir, bu il, ümumiyyətlə, yeniliklərlə və sürprizlərlə doludur. 2025 alimlərin, yaradıcı insanların, filosofların və siyasətçilərin ilidir. İlan ili Azərbaycan üçün uğursuz il omamalıdır, çünki Azərbaycan özü əqrəb bürcündə qərar tutmaqdadır, əqrəb isə sirlərlə, mistikalarla dolu bir varlıqdır. Əbəs yerə deyil ki, əqrəb bütün ezoterik kitablarda, müxtəlif etnik qrupların inanclarında simvolik olaraq magik rol oynamışdır. İlan da əqrəb kimi mistik, sirlərlə doludur. Hələ qədim zamanlarda Misir mədəniyyətində fironun sehrbazlarının ipləri ilana çevirmələri də buna misaldır. Musa peyğəmbərin (ə) əsasının ilana (əjdahaya) çevrilməsi də başqa bir misal sayıla bilər".  

Ekspert bildirib ki, bu il qiymətli metallara diqqət yetirmək lazımdır:

"Bu il dövlət büdcəsinin möhkəmlənməsi, iş adamlarınnın öz vəsaitlərini çoxaltması üçün əlverişli ildir. Xüsusən də, bu il qızıl və gümüş kimi qiymətli metallara önəm vermək məsləhətlidir. Çünki 2025-ci ilə qədəm qoyan ilan xəzinə ilanıdır. O, xəzinə üstündə yatır və xəzinə qoruyucusudur".

Milli.Az