Dünya

Gülnarə Kərimovanın oğlu: "Xüsusi xidmət orqanları anamı təcrid edib"

3 Dekabr 2016 15:58

0 Şərh Baxış: 1 946

#DÜNYADA

Özbəkistanın sabiq prezidenti İslam Kərimovun qızı Gülnarə Kərimovanın oğlu Özbəkistan rəsmilərindən anasının taleyi ilə bağlı rəsmi açıqlama tələb edib.

Milli.Az-ın APA-ya istinadən məlumatına görə, babasının adını daşıyan İslam Kərimov BBC-yə müsahibəsində deyib ki, anası uzun müddət Daşkənddəki villasının həyətindəki 3 otaqlı yardımçı binada saxlanılıb. İ.Kərimov saxlanma şəraitinin anasının sağlamlığına mənfi təsir etdiyini bildirib. Bununla yanaşı, o qeyd edib ki, anasının psixi durumunun pozulması və onun xəstəxanaya yerləşdirildiyi barədə yayılan məlumatlar əsassızdır.

Anasının Özbəkistanın xüsusi xidmət orqanları tərəfindən təcrid olunmuş vəziyyətdə saxlanıldığını qeyd edən İ.Kərimov onlardan anasının taleyi ilə bağlı açıqlama verməyi tələb edib: "Necə olur ki, XXI əsrdə Gülnarənin harada olduğu, hansı şəraitdə və nə üçün saxlanıldığı barədə suala cavab verilmir?!"

O əlavə edib ki, anası ilə birbaşa əlaqəsi yoxdur, lakin Özbəkistanda yaşayan bacısı İmanla əlaqə saxlamaq imkanı var. İ.Kərimovun sözlərinə görə, nə özünə, nə anasına, nə də bacısına babasının dəfninə qatılmağa icazə verməyiblər.

Milli.Az