ABŞ-ın sabiq dövlət katibi, Demokrat Partiyasından prezidentliyə namizəd Hillari Klintonun xarici siyasət məsələləri üzrə müşaviri Huma Abidin boşanır. O, bəyan edir ki, ərindən - sabiq siyasətçi Entoni Uinerdən ayrı yaşamağa qərar verib.
Milli.Az New York Post-a istinadən bildirir ki, Huma Abidinin açıqlamasında deyilir: "Uzun sürən və ağrılı düşüncələrdən, nikahımla bağlı götür-qoydan sonra ərimdən ayrı yaşamaq qərarına gəldim".
Entoni Uinerin Twitter-də kimliyi hələlik açıqlanmayan bir qadınla açıq-saçıq məzmunlu yazışmalarda olduğu aşkarlanmışdı.
Uinerin bu qadına yolladığı foto da yayılıb. Həmin fotoda Uiner uşaqla yataqdadır.
Entoni Uiner əvvəllər də sosial şəbəkələrdə əxlaqsız mesajlar yazmaqla məşğuldu. 2011-ci ildə o, Twitter-də bir qadına tərbiyəsiz fotolar və mətnlər yollamışdı və bu yazışmanın faş olması Uinerin siyasi karyerasına son qoymuşdu. ABŞ Konqresində Nyu-York ştatını təmsil edən Uiner konqresmen postundan istefa verməli olmuşdu.
2013-cü ildə məhz bu qalmaqala görə o, Nyu-York meri postuna keçirilən seçkiləri uduzmuşdu.
Milli.Az