İdman

Naxçıvanda kikboksinq turniri

26 Aprel 2017 18:25
Baxış: 1 398
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Milli.Az bildirir ki, mayın 1-də Şərur Rayon Olimpiya İdman Kompleksində Ümummilli lider Heydər Əliyevin anadan olmasının 94-cü ildönümünə həsr olunmuş kikboksinq üzrə peşəkarlararası IX ənənəvi turnir keçiriləcək. 

Azərbaycan Respublikasının və Naxçıvan Muxtar Respublikasının Gənclər və İdman nazirliklərinin, Azərbaycan Kikboksinq Federasiyasının birgə təşkilatçılığı ilə keçiriləcək turnir haqqında məlumat verən Federasiyanın prezidenti, millət vəkili Adil Əliyev bildirib ki, budəfəki yarışda iki versiya üzrə, K-1 və low-kik versiyaları üzrə 14 idmançı öz gücünü sınayacaq:

"Yığma komandanın ən güclüləri həm kəmər uğrunda, həm də kubok uğrunda döyüşəcəklər. Hesab edirəm ki, dəfələrlə dünya və Avropa çempionu adını qazanmış kikboksçularımızın yarışı olduqca maraqlı keçəcək".  

AKF prezidenti qeyd edib ki, dahi şəxsiyyəti məhz Naxçıvanda anmaq heç də təsadüfü deyil:

"Əlbəttə ki, ulu öndərin ata-baba yurdunda onun xatirəsini anmaq hər kəs kimi yerli əhalinin də ürəyincə olan hal kimi qiymətləndirilir. Məhz bu amili nəzərə alaraq hər zaman idmana, idmançılara diqqət və qayğı ilə yanaşan, müasir Azərbaycanın qurucusu və memarı ulu öndər Heydər Əliyevin xatirəsinə həsr edilən yarışlarımızı artıq bir ənənəyə çevrmişik. Respublika səviyyəsində keçirilən tədbirlərin sırasına mütəmadi olaraq kikboksinq yarışlarını da əlavə etmək federasiyamızın qarşısında duran əsas vəzifələrdəndir".

Adil Əliyev vurğulayıb ki, ulu öndərin həyata keçirdiyi strategiya bu gün Azərbaycan Respublikasının Prezidenti, Milli Olimpiya Komitəsinin Prezidenti, Ali baş komandanımız cənab İlham Əliyev tərəfindən uğurla davam etdirilir:

"Ölkəmiz dünyada bu gün  idman ölkəsi kimi tanınır, ən mötəbər idman tədbirlərinə ev sahibliyi edir. Bütün bunlar ölkə rəhbərinin diqqət və qayğısının bəhrəsidir. İnanıram ki, uğurlarımız, nailiyyətlərimiz bundan da çox olacaq, Azərbaycan idmançıları üçrəngli bayrağımızı möhtəşəm idman arenalarında dalğalandıracaqlar".

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.