Bu gün Avropa Liqasında 2014/2015 mövsümünün qalibi bəlli olacaq.
Qol.az-ın məlumatına görə, final matçında "Dnepr" (Ukrayna) və "Sevilya" (İspaniya) klubları üz-üzə gələcək.
Avropa Liqasının son qalibi olan Sevilya təmsilçisi titulunu qorumağa çalışacaq. "Qarabağ"la eyni qrupda mübarizə aparmış "Dnepr" isə tarixində ilk dəfədir ki, final həyəcanı yaşayır.
Xatırladaq ki, Dnepropetrovsk klubu Bakıda keçirilən "Qarabağ" - "İnter" matçında hakimin kobud səhvi nəticəsində qrupdan çıxıb. Ağdam klubunun təmiz qolunun sayılmaması sayəsində "pley-off"a təmsilçimiz deyil, "Dnepr" yüksəldi.
Onu da qeyd edək ki, Miron Markeviçin komandası cari mövsüm cəmi dörd dəfə məğlub olub. Bunlardan biri "Qarabağ"la Kiyevdə keçirilən oyuna təsadüf edib.
Polşada keçiriləcək həlledici oyun Bakı vaxtı ilə saat 23:45-də başlayacaq.
27 may
Avropa Liqası, final
23:45. "Dnepr" (Ukrayna) - "Sevilya" (İspaniya)
Baş hakim: Martin Atkinson (İngiltərə)
Milli.Az