Topaz Premyer Liqasının yeni mövsümünə uğursuz başlayan "Xəzər Lənkəran" klubunun baş məşqçisi Oğuz Çətin heyətə əl gəzdirməyə başlayıb. Milli.Az apasport.az-a istinadən xəbər verir ki, keçirdiyi 2 oyunda cəmi 1 qol vuran "ağ-yaşıllar"ın çalışdırıcısı braziliyalı hücumçu Franko Nildodan narazıdır.
Türkiyəli mütəxəssis 31 yaşlı futbolçu ilə söhbətində ona xeyli müddətdir komandada olmasına baxmayaraq, özünü heç cür göstərə bilməməyini xatırladıb. Elə Nildo da Çətinə klubdan getmək arzusunda olduğunu söyləyib.
Ölkə çempionatının III turunda Zaqatalada "Simurq"la qarşılaşacaq "Xəzər Lənkəran" hazırda paytaxtdakı "Modern" otelində məskunlaşıb. Amma dünəndən məşqlərə qatılmayan Nildo özünə yeni komanda axtarışındadır.
Xatırladaq ki, Nildo "Xəzər Lənkəran"a uelsli baş məşqçi Con Toşakın vaxtında AZAL klubundan transfer olunmuşdu.
Milli.Az