Azərbaycan hərbi gəmiləri Rusiyaya girdi - FOTO

Azərbaycanın Hərbi Dəniz Qüvvələrinin gəmiləri avqustun 3-dən 15-dək davam edəcək "Xəzər Kuboku-2015" yarışlarında iştirak üçün Rusiyanın Həştərxan şəhərinə gedib.

Anspress-in məlumatına görə, bu barədə "İnterfaks" agentliyi Rusiyanın "Cənub" hərbi dairəsinin mətbuat xidmətinə istinadla xəbər yayıb.

Bildirilir ki, Azərbaycanın hərbi dənizçiləri Birinci Hərbi-İdman Oyunları çərçivəsində keçiriləcək Beynəlxalq "Xəzər Kuboku-2015" yarışlarının iştirakçılarıdılar. Azərbaycan Hərbi Dəniz Qüvvələrinin 2 patrul-gözətçi gəmisi Xəzər flotiliyasının gəmi briqadası məntəqəsinə - Mahaçkala limanına daxil oldu. Bu gəmilər beynəlxalq yarışa qoşulmaq üçün gəldi. "Xəzər Kuboku-2015" müsabiqəsi Xəzər dənizi akvatoriyasında xüsusi təchiz edilmiş 300 kilometrlik poliqonda baş tutacaq.

Azərbaycan gəmilərini dənizdə Xəzər Donanmasının "Qrad Sviyajsk" və "Uqliç" kiçik raket gəmiləri qarşılayıb. Gəmilərin paralel şəkildə hərəkət edib və Rusiya dənizçiləri Azərbaycan həmkarlarını salamlayıblar. Sonra gəmilər limana yaxınlaşıb, burada gəmi dəstəsini "RB-39" reyd gəmi donanması qarşılayıb və onun müşayiəti ilə gəmi dəstəsi əsas məntəqəyə daxil olaraq sahilə yan alıb. Azərbaycan dənizçiləri Rusiya sahilində rus ənənəsi üzrə - duz-çörəklə qarşılanıblar. Qonaqları Rusiyanın Hərbi Dəniz Flotu adından yarışın təşkilat komitəsinin sədri, Rusiyanın Hərbi Dəniz Donanmasının Döyüş Hazırlığı İdarəsinin rəisi, kontr-admiral Viktor Koçemazov salamlayıb.

Burada təşkil olunan görüş başa çatdıqdan sonra yarış iştirakçısı olan üç Xəzəryanı ölkə - Rusiya, Qazaxıstan və Azərbaycan hərbçiləri dəniz poliqonunda şturman yürüşü ediblər.

Bu arada Azərbaycanın müdafiə naziri Zakir Həsənov iyulun 31-də Moskvaya səfər edib. Nazir avqustun 1-dən 15-dək Moskva vilayətindəki poliqonda keçiriləcək Hərbçilərin Beynəlxalq İdman Oyunlarının açılış mərasiminə qatılacaq.

Səfər çərçivəsində Zakit Həsənovun rusiyalı həmkarı Sergey Şoyqu ilə görüşü də nəzərdə tutulur.

Birinci Hərbi-İdman Oyunlarında 17 ölkədən 57 komanda, 6 xarici ölkədən 20 müşahidə qrupu, Avropa, Asiya, Afrika və Latın Amerikası ölkələrinin nümayəndələri iştirak edəcəklər. Oyunların proqramına səhra, hava və dəniz növləri üzrə 14 müsabiqə daxildir.

Hərbi-İdman Oyunları proqramının iki müsabiqəsi Hərbi Dəniz Donanması tərəfindən təşkil olunub. "Xəzər derbisi" adlandırılan bu yarışda hərbi-dəniz qüvvələrinin zirehli maşınları qatılacaq. Bu yarışda Rusiya, Azərbaycan, Qazaxıstan və Çin dəizçiləri mübarizə aparacaq. Yarışda hərbi gəmilərin döyüş hazırlığı yoxlanılacaq. Müsabiqə Dağıstanın Kaspiysk şəhərində keçiriləcək.

Rusiya paytaxtı Moskvada iyulun 25-dən 31-dək Müstəqil Dövlətlər Birliyi (MDB) ölkələrinin Silahlı Qüvvələrinin birinci hərbi-idman oyunları keçirilib. Rusiya Federasiyası Silahlı Qüvvələrinin fiziki hazırlıq idarəsinin rəisi Oleq Bosman bildirib ki, MDB dövlətlərinin Müdafiə Nazirləri Şurası ilk dəfə Böyük Vətən müharibəsində Qələbənin 70 illik yubiley mərasimində belə yarışların keçirilməsi haqqında qərar qəbul edib. Hərbi-İdman Oyunlarında Qazaxıstan, Belarus, Qırğızıstan, Ermənistan, Tacikistan və Rusiyadan təqribən 300 hərbçi qatılıb.

Milli.Az