İyulun 3-də Gürcüstanda səfərdə olan Mətbuat Şurasının sədri Əflatun Amaşov azərbaycanlıların kompakt yaşadığı Marneulidə Milli Mətbuatımızın 140 illiyinə həsr olunan tədbirdə azərbaycanlı jurnalistlərlə görüşəcək.
Milli.Az APA-ya istinadən bildirir ki, tədbir Azərbaycanlıların Mədəniyyət Mərkəzinin və Gürcüstan Azərbaycanlı Jurnalistlər Birliyinin birgə təşkilatçılığı ilə baş tutacaq.
Görüşdə milli mətbuatımızın tarixi, qarşıda duran vacib məsələlər, söz və ifadə azadlığı çərçivəsində Azərbaycan jurnalistikasının inkişafı, Azərbaycan jurnalistlərinin I Avropa Oyunlarının işıqlandırılmasında əldə edilən müsbət təcrübələrdən və Gürcüstanda Azərbaycandilli jurnalistikanın problemlərindən söhbət açılacaq.
Tədbirdə Azərbaycan səfirliyinin rəsmiləri, Gürcüstan parlamentinin deputatları, Marneuli rayon icra hakimiyyəti və bələdiyyə rəhbərliyi, Gürcüstanda nəşr olunan Azərbaycandilli mətbuatda çalışan jurnalistlər və ziyalılar iştirak edəcəklər.
Qeyd edək ki, Əflatun Amaşov bu gün Tiflisdə Avropa Birliyinin təşkilatçılığı ilə söz azadlığı və medianın özünütənzimləmə məsələlərinə həsr olunmuş beynəlxalq konfransda iştirak edib.
Milli.Az