Cəmiyyət

ADA Universitetinin tələbələri təhsillərini 16 xarici universitetdə davam etdirəcəklər

30 İyun 2015 16:22
Baxış: 802
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

ADA Universitetinin 24 tələbəsi gələn tədris ilində təhsillərini xarici universitetlərdə davam etdirəcəklər.

Universitetdən Trend-ə verilən məlumata görə, bu universitetlər sırasına ABŞ, Fransa, Böyük Britaniya, Türkiyə, Macarıstan, Cənubi Koreya, Çin, Estoniya, Litvada yerləşən və ADA Universiteti ilə tədris mübadiləsi haqqında anlaşmaları olan 16 aparıcı ali təhsil ocağı daxildir. Öz növbəsində, həmin xarici universitetlərdən 9 tələbə mübadilə proqramı əsasında ADA Universitetində təhsil alacaqlar.

Hazırda ADA Universiteti 50-dən çox xarici təhsil ocağı ilə müəllim, tələbə və tədqiqat mübadiləsini nəzərdə tutan əməkdaşlıq qurub. ADA magistr və bakalavrları təhsilin ikinci ilindən başlayaraq bu tərəfdaş universitetlərin birində mübadilə semestri keçirmək imkanı əldə edirlər.

2015-ci tədris ilinə Britaniyanın Qlazqo Universitetində başlayacaq beynəlxalq münasibətlər tələbəsi Xəyalə Cəfərova bildirib ki, öyrəndiyi sahə üzrə aparıcı təhsil ocaqlarından hesab edilən Qlazqo Universitetində oxumaq ona çox faydalı olacaq: "İnanıram ki, Qərb təhsil sistemi və yeni mədəniyyətlə daha yaxından tanış olmaq gələcək diplomat kimi mənə üstünlük verəcək". Biznesin idarə edilməsi üzrə bakalavr Ceyhun Məhərrəmli isə Fransanın IESEG Menecment Məktəbinə yola düşür: "Burada biznesi öyrənənlərə sonsuz imkanlar verilir. IESEG-də vaxtımdan səmərəli istifadə edəcəyəm. Əminəm ki, bu mənim biznes karyeram üçün yaxşı təkan olacaq".

Qeyd edək ki, təhsil mübadiləsi proqramında iştirak edən ADA Universitetinin tələbələri müvafiq akademik göstəricilər nümayiş etdirməli və universitetin daxili seçim mərhələsindən keçməlidirlər. Təhsil mübadiləsi proqramları ADA Universitetinin dünya standartlarına uyğun təhsil verməsi və beynəlmiləl akademik mühit yaratması məqsədlərini dəstəkləyir.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.