Cəmiyyət

Azərbaycan bayrağı Kaliforniyada qaldırıldı - FOTO

20 Oktyabr 2014 11:22
Baxış: 1 225
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən
Azərbaycanın Müstəqillik Günü münasibətilə 2014-cü ilin oktyabrın 17-də ABŞ-ın Kaliforniya ştatının San-Xose şəhərinin meriyası qarşısında Azərbaycanın dövlət bayrağı qaldırılıb.

Azərbaycanın Los-Ancelesdəki Baş Konsulluğundan Trend-ə verilən məlumata görə, dövlət bayrağımızın qaldırılması San-Xose şəhərində fəaliyyət göstərən Azərbaycan İcma Mərkəzinin sədri Mehriban Məmmədovanın səyləri və Azərbaycanın Los-Ancelesdəki Baş Konsulluğunun dəstəyi ilə gerçəkləşib.

Bu münasibətlə keçirilən mərasimdə Azərbaycanın Los-Ancelesdəki baş konsulu Nəsimi Ağayev iştirak edib. Həmçinin, San-Xose şəhərinin meri Çak Rid, vitse-meri Mədison Nquyen, Şəhər Şurasının üzvü Conni Xamis, eləcə də yerli Azərbaycan icmasının üzvləri və digər şəxslər tədbirə qatılıblar.

Qeyd edilməlidir ki, San-Xose şəhəri dünyanın informasiya texnologiyaları mərkəzi olan Silikon Vadisinin paytaxtıdır, ABŞ-ın 10-cu, Kaliforniyanın isə 3-cü ən böyük şəhəridir.
Tədbirin başlanğıcında Azərbaycan bayrağı dövlət himnimizin sədaları altında təntənəli surətdə qaldırlıb.

Mərasimdə çıxış edən baş konsul N.Ağayev Azərbaycanın müstəqilliyinin bərpa olunmasına gedən yoldan, bu yolda Azərbaycan xalqının verdiyi qurbanlardan, müstəqil dövlət kimi ölkəmizin əldə etdiyi uğurlardan və qısa müddətdə bölgənin ən güclü dövlətinə çevrilməsindən söhbət açıb.

San-Xose şəhərinin meri Çak Rid isə çıxışında Azərbaycan bayrağının San-Xose meriyası qarşısında ilk dəfə qaldırılmasının əlamətdar hadisə olduğunu, Azərbaycan ilə ABŞ arasında münasibətlərin iki xalqın mənafelərinə uyğun olaraq daha da inkişaf etdirilməsinin vacib olduğunu diqqətə çatdırıb.

Azərbaycan İcma Mərkəzinin sədri Mehriban Məmmədova çıxış edərək, San-Xose şəhərində Azərbaycan bayrağının qaldırılması işinə verilən dəstəyə görə təşəkkürünü bildirmiş, bundan sonra bir ənənə olaraq hər il Müstəqillik Günü münasibətilə meriya qarşısında bayrağımızın qaldırılmasından məmnun olacaqlarını söyləyib.

Tədbirdə San-Xose vitse-meri M.Nquyen və Şəhər Şurasının üzvü C.Xamis də çıxış edərək, Müstəqillik Günü ilə bağlı təbriklərini çatdırıb, Azərbaycana bundan sonra da böyük uğurlar arzulayıblar.

Milli.Az

Böyütmək üçün şəkillərə klikləyin.

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.