Danimarkadakı 24/7 radiostansiyasında heyvanların hüquqlarının qorunmasına həsr olunmuş proqram böyük qalmaqalla başa çatıb.
Proqramın aparıcısı Asger Yul heyvanların hüquqlarının müdafiəsi sahəsində həmvətənlərinin saxtakarlıq və ikiüzlülük etdiklərini göstərməyə çalışıb.
Milli.Az Daily Mail-ə istinadən bildirir ki, o, studiyaya "Alan" adlı 9 aylıq dovşan balası gətirmişdi.
Studiyada mübahisələrin başa çatmasına az qalanda, heyvan haqlarının müdafiəsi ilə məşğul olan təşkilatın nümayəndəsi Lesse Kessler studiyanı tərk edəndə Yul planını icra etməyə başlayıb.
Danimarkalıların hər gün ət yediklərini və "zavallı heyvanların qorunması" ilə bağlı söhbətləri maksimal naturalizmlə əvəzləyəcəyini deyən aparıcı "İndi studiyada dovşan əti hazırlayacağam!" söyləyib.
Bunu eşidən Lesse Kesler studiyaya qayıdaraq dovşan balasını xilas etməyə çalışıb. Amma artıq gecdi. Asger Yul "Alan"ın başına velosiped nasosu ilə 3 zərbə vuraraq dovşan balasını öldürmüşdü.
Daha sonra o, dovşan ətindən raqunun hazırlanmasına uşaqları da cəlb edib.
"Yemək yeməliyəm. Deməli, yemək hazırlamağım üçün bu heyvan ölməliydi", - Yul söyləyib.
Bu olay ölkədə çox böyük qalmaqal doğurub.
Asger Yul TV2 telekanalına verdiyi müsahibəsində deyib: "Danimarkalılar hər gün ət yeyirlər, amma heyvanların öldürülməsi ilə razı deyillər. Belə davranış absurddur. Axı ət yemək üçün heyvanı öldürmək lazımdır. Qətl hər kəsin qatılması gərəkən diskussiyanın tərkib hissəsidir".
Qalmaqal da radioaparıcını qorxutmayıb: "O dovşan balasının ətindən əla raqu alındı. Mənə 8 və 6 yaşlı iki uşaq da yardım etdi".
Milli.Az
Videonu izləmək üçün şəklə klikləyin.