Bakıda özünü sərbəst hiss edirsən. Milli.Az bildirir ki, bunu Trend-ə bədii gimnastika üzrə Fransa yığmasının baş məşqçisi Svetlana Mustafayeva deyib.
O qeyd edib: "Biz Bakıda Avropa çempionatı və Avropa Oyunlarında olmuşuq. Yəqin ki, bu, soyadımdan irəli gəlir, Bakıda özümü sərbəst hiss edirəm. Dəstəyə görə tamaşaçılara təşəkkür edirəm. Sizin möhtəşəm arenanız var, burada çıxış etmək zövq verir".
Öz yetirməsi olan Kseniya Mustafayevanın çıxışına toxunan baş məşqçi vurğulayıb ki, nəticədən razıdır.
"Biz artıq ötən gün yaxşı çıxış etdik, dörd finalın hamısına yüksəldik və Kseniya özünü çox yaxşı göstərdi. Bu gün də yaxşı başladı. İlk hərəkətin həmişə çətin olmasına baxmayaraq, Kseniya öhdəsindən gəldi və yaxşı nəticə əldə etdi. Toparlanmaq və digər finallarda uğurlu çıxış etmək lazımdır".
Qeyd edək ki, bu il bədii gimnastika üzrə FIG Dünya Kubokunun finalı 22-24 iyul tarixlərində Azərbaycanın paytaxtında keçirilir. Yarışların ilk iki günündə çoxnövçülükdə 17 ölkənin gimnastı medallar uğrunda mübarizə aparır. Dünya Kubokunun son günündə ayrı-ayrı növlər üzrə finallar keçiriləcək.
Milli.Az