10 yaşlı amerikalı Lena Draper indi ABŞ-ın ən məşhur uşaqlarından biridir. Onu populyar edən isə ABŞ-ın Ohayo ştatındakı Merion şəhəri polis departamentinə müraciət etməsidir.
Milli.Az ABC-yə istinadən bildirir ki, riyaziyyatdan ev tapşırığının öhdəsindən gələ bilməyən balaca Lena şəhər polis departamentinin Facebook-dakı səhifəsinə üz tutub.
"Ev tapşırığı ilə bağlı çətinliyim var. Mənə yardım edə bilərsiniz?", - Lena yazmışdı.
Polis departamentinin səhifəsinin inzibatçısı da ona Facebook səhifəsinin sutka boyu aktiv olmadığını, problem varsa, 911 xilasetmə xidmətinə zəng vurmasını, və ya polis zabiti ilə əlaqə saxlamasını məsləhət görüb.
Amma inzibatçı yenə də laqeyd qalmayıb və yazıb: "Nə baş verir, nə olub?"
Lena yazıb: "Ev tapşırığı ilə bağlı kiçik yardıma ehtiyacım var".
Zabit soruşub: "Okey, nədir problem?"
Lena problemindən bəhs edib: "(8+29)x15. Bu misalı həll edə bilmirəm".
Merion şəhər polis departamentinin Facebook-dakı səhifəsinin inzibatçısı olan zabit Barri Qruber də ona yardım edib, misalı həll edib.
Lenanın anası Mollinin dediyinə görə, polis zabitinin qızına yardım etməsi onu riqqətə gətirib.
Milli.Az