Maraqlı

Məşhurların övladları: Sabir Rüstəmxanlının prezident oğlu - FOTO

29 Noyabr 2015 15:33
6 Şərh     Baxış: 27 802
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Azərbaycanda yüksək vəzifələr tutan məmurların, tanınmış simaların övladları ilə bağlı məlumatlar tez-tez media vasitəsilə gündəmə gəlir, kimisi haqda yaxşı sözlər danışılır, kimisi barədə isə əksinə... 

Cəmiyyətin bütün təbəqələri kimi, vəzifəli şəxslərin, məşhurların övladları arasında nümunəvi davranışları ilə seçilənlər də var və təbii ki, bunun əksinə olanlar da...

Ümumiyyətlə, məmurların və məşhurların övladları haqqında bilgilər ictimaiyyətə də həmişə maraqlı gəlib - onlar kimdirlər, harada çalışır, nə işlərlə məşğuldurlar...

Modern.az saytı "Məşhurların övladları" adlı rubrikasında ictimai, siyasi xadimlərin, mədəniyyət, ədəbiyyat, idman və digər sahələrdə tanınmış simaların övladları haqda bilgilərin təqdimatını davam etdirir. 

Budəfəki təqdimatımız xalq şairi, Dünya Azərbaycanlıları Konqresinin həmsədri, Vətəndaş Həmrəyliyi Partiyasının sədri, eks-millət vəkili Sabir Rüstəmxanlının oğlu Cəmil Rüstəmxanlı haqqındadır.

O Sabir Rüstəmxanlı ki, bir neçə gün öncə - 24 noyabrda 25 illik deputatlıq karyerasına son qoyuldu. Gələn il - 2016-da 70 illik yubileyini qeyd etməyə hazırlaşan Sabir Rüstəmxanlı 1946-cı il mayın 20-də Yardımlı rayonunun Hamarkənd kəndində doğulub. Azərbaycan Dövlət Universitetinin Filologiya fakültəsini bitirib. Filologiya elmləri doktorudur. Azərbaycanın xalq şairidir. "Şöhrət" ordeni ilə təltif edilib. Dünya Azərbaycanlıları Konqresinin həmsədridir. 30-dan çox kitabın müəllifidir, onlardan 10-u xarici ölkələrdə çap edilib. Rus və fars dillərini bilir.
1967-ci ildən "Ədəbiyyat və incəsənət" qəzetinin redaksiyasında kiçik ədəbi işçi, baş ədəbi işçi, şöbə müdiri, xüsusi müxbir, 1978-ci ildən "Yazıçı" nəşriyyatında şöbə müdiri, baş redaktorun müavini, baş redaktor, 1989-1991-ci illərdə "Azərbaycan" qəzetinin baş redaktoru olub. 1991-ci ildən Azərbaycan Respublikası Dövlət Mətbuat Komitəsinin sədri, 1992-1995-ci illərdə mətbuat və informasiya naziri vəzifələrində çalışıb.
1992-ci ildən yaratdığı Vətəndaş Həmrəyliyi Partiyasının sədridir.
Sabir Rüstəmxanlı 1990-cı ildən 2015-ci ilin 24 noybrınadək Milli Məclisin deputatı olub.

2003-cü il prezident seçkilərində namizəd kimi iştirak edib.

Onun "Ömür kitabı" adlı əsəri Azərbaycanda xalqın milli və yurdsevərlik duyğularının oyanmasında ciddi rol oynayıb və 1988-ci il milli-azadlıq hərəkatının mənəvi təməllərindən biri olub. "Tanımaq istəsən", "Xəbər gözləyirəm", "Gəncə qapısı", "Sağ ol, ana dilim!", "Qan yaddaşı", "Zaman məndən keçir" və sair kimi şeir kitablarının, "Bütövlük", "Didərginlər", "Cavad xan", "Orxonla görüş" poemaların, "Bu sənin xalqındır" publisistik yazılarından ibarət əsərin, "Atamın ruhu", "Xətai yurdu", "Göy Tanrı", "Ölüm yaşamaqdan şirinmiş (Cavad xan)" romanlarının müəllifidir. Əsərləri bir çox dünya xalqlarının dillərinə tərcümə olunub. 

S.Rüstəmxanlı 1988-ci ildə başlanan milli azadlıq hərəkatının ilk təşkilatçılarından və liderlərindən, Azərbaycan Xalq Cəbhəsinin yaradıcılarından biri olub. 1989-cu ildə Azərbaycanda ilk müstəqil, demokratik qəzet olan "Azərbaycan"ı təsis edib, iki il onun baş redaktoru olub.
Evlidir, iki oğlu, iki qızı var.

Cəmil Rüstəmxanlı Sabir Rüstəmxanlının üçüncü övladı, kiçik oğludur. Cəmil Sabir oğlu Rüstəmxanlı 1987-ci ildə anadan olub. Azərbaycan Dövlət İqtisad Universitetini bitirib. Təxminən 2 il müddətində indiki Diasporla İş üzrə Dövlət Komitəsində də çalışıb. 

Sonra Şimali Kipr Türk Respublikasında Yaxın Doğu Universitetində diplomat ixtisası üzrə ikinci ali təhsil alıb. Orada həm də diaspor işində çalışıb - Kuzey Kıbrıs Türk Cümhuriyyəti Kültür Dərnəyinin sədr müavini kimi fəaliyyət göstərib. 
Azərbaycana qayıdandan sonra Cəmil Rüstəmxanlı Nəqliyyat Nazirliyinin "Azəryolservis" Açıq Səhmdar Cəmiyyətində işə düzəlib. O, əvvəlsə "Azəryolservis"də tərcüməçi, sonra beynəlxalq əlaqələr idarəsində qrup rəhbəri təyin edilib. 

2015-ci ilin aprelində nəqliyyat naziri Ziya Məmmədovun əmri ilə "Azəryolservis"də 4 saylı Layihə idarəetmə qrupunun direktoru vəzifəsində çalışan Cəmil Rüstəmxanlı "Azəryolservis" ASC sədrinin müavini - İnvestisiya idarəsinin rəisi vəzifəsinə təyin edilib.

2015-ci ilin sentyabrında isə Cəmil Rüstəmxanlı daha bir vəzifəyə seçilib. Belə ki, o, "Azəryol" voleybol klubunun prezidenti vəzifəsinə gətirilib.

Cəmil Rüstəmxanlı nəqliyyat naziri Ziya Məmmədovun qardaşı İldırım Məmmədovun qızı ilə ailə həyatı qurub.

Milli.Az

Məqaləyə dair fotomateriallar:

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.