İyunun 16-18-də Azərbaycanda "Bakı Ekspo" sərgi mərkəzində "TransCaspian" 10-cu Yubiley Beynəlxalq Nəqliyyat, Tranzit və Loqistika Sərgisi keçiriləcək. Nəqliyyat sahəsində bu sərgi ənənəvi olaraq nəqliyyat infrastrukturunun vəziyyəti haqqında düzgün təsəvvür yaradan ilin əsas hadisəsi hesab olunur.
Keçirildiyi illər ərzində bu sərgi regionun nəqliyyat sənayesi üçün yenilikçi texnologiya və avadanlıqların nümayiş etdirilməsi, yeni nümayəndəliklərin açılması və birgə müəssisələrin təsis edilməsinə şərait yaradan ən mühüm nəqliyyat forumuna çevrilmişdir.
Sərgi təsis edildiyi gündən Azərbaycan Respublikası Nəqliyyat Nazirliyi tərəfindən dəstəklənir və "TRASEKA" ilə sıx əməkdaşlıq edir. Sərginin təşkilatçıları "ITE Group PLC" və onun Qafqazdakı tərəfdaşı "Iteca Caspian LLC" şirkətləridir. 2011-ci il sərgilərinin tərəfdaşları isə "Azerfon-Vodafone", "AZAL", "Greenwich Travel Club" və "Caspel" şirkətləri, habelə "Qafqaz Poynt" mehmanxanasıdır.
Artıq 10 ildir ki, "TransCaspian" sərgisi öz meydançasında sanballı tərkibdə sərgi iştirakçılarını, o cümlədən maddi-texniki təchizat (loqistika) operatorları, daşıma şirkətləri, dəmiryol, dəniz və hava nəqliyyatı şirkətləri, gəmiqayırma və yol tikinti şirkətləri, kommersiya nəqliyyatının distribütorları, liman və nəqliyyat sahəsinin bir çox digər müəssisələrini bir araya gətirir.
Bu ilki sərgi eyni zamanda iki parametr üzrə analoqu olmayan artım ilə seçilir. Belə ki, iştirakçıların tutduqları sərgi sahəsi ötən il ilə müqayisədə 60% çoxdur, iştirakçıların sayı isə 2 dəfə artmışdır. Ümumilikdə, bu il yubiley "TransCaspian" sərgisində Azərbaycan, Almaniya, İran, Çin, Latviya, Rusiya, Türkiyə, Ukrayna, Fransa və Çexiyanı təmsil edən 54 şirkət, təşkilat və sənaye strukturları iştirak edirlər. Faiz nisbəti baxımından isə xarici qonaqların sayı təqribən 50% təşkil edir.
Getdikcə daha çox yeni şirkət Azərbaycanda keçirilən bu sərgiyə maraq göstərir və bu il debütant şirkətlərin sayı bütün sərgi iştirakçılarının 30%-ni təşkil edir. Sərgi debütantlarının siyahısına Riqa Ticarət Limanı, Həştərxan "Olya" Limanı, "CNR" Korporasiyası (Çin), "Mot McDonald" şirkəti (Çexiya) və s. daxildir.
İlk dəfə olaraq, sərgidə Latviyanın milli stendi iştirak edir. Kommersiya şirkətləri ilə yanaşı, sərgidə dövlət idarələri, o cümlədən Azərbaycan Respublikası Nəqliyyat Nazirliyi, "Azərbaycan Dəmir Yolları" QSC, Azərbaycan Dövlət Xəzər Dəniz Gəmiçiliyi, Bakı Beynəlxalq Dəniz Ticarət Limanı, Bakı Metropoliteni və Rusiyanın Azərbaycanda Dəniz Gəmiçiliyi Reyestri iştirak edirlər.
Yubiley "TransCaspian" sərgisi nəqliyyat-ekspeditor xidmətlərindən tutmuş yüklərin çeşidlərə ayrılması üzrə proqram təminatı və avadanlıqlara qədər sahə xidmətlərinin bütün istiqamətləri ilə tanış olmağa şərait yaradacaq. Bu il sərgidə dəmir yolu sektoru, dəniz nəqliyyatı, limanlar və daşımalar ən geniş şəkildə təqdim edilmişdir. Sərgi üçün iştirakçı şirkətlərin kataloqundan əlavə, sərgidə təqdim olunan metro və vaqonqayırma sənayesinin yenilikləri haqqında məlumatları əks etdirən yeniliklər kataloqu da dərc ediləcək.
Yubiley "TransCaspian" sərgisi ilə bağlı geniş işgüzar proqram tərtib edilmişdir. Belə ki, iyunun 17-də "Baku Ekspo" sərgi mərkəzinin konfrans zalında "Azərbaycanın strateji nəqliyyat dəhlizləri kəsişməsində tranzit ölkə olaraq artan rolu və inkişaf etdirilən nəqliyyat infrastrukturu" mövzusunda 1-ci Xəzər Beynəlxalq Nəqliyyat Konfransı keçiriləcək. Konfransda Azərbaycan Respublikası Nəqliyyat Nazirliyi, Rusiya Federasiyası Nəqliyyat Nazirliyi, habelə kommersiya və ictimai təşkilatların nümayəndələri iştirak edəcəklər.
Mütəxəssislər Azərbaycanın nəqliyyat kompleksinin fəaliyyəti və inkişafı və dünya nəqliyyat sisteminə inteqrasiyasının gələcəyi, eləcə də ölkənin nəqliyyat kompleksinin gələcək prioritet və perspektiv istiqamətləri xüsusunda gündəmdə duran aktual məsələləri müzakirə edəcəklər. Beynəlxalq nəqliyyat dəhlizləri çərçivəsində yerinə yetirilən daşıma əməliyyatları ilə əlaqədar məsələlərə isə xüsusi diqqət yetiriləcək.
Həmçinin, iclaslardan biri məhz ictimai nəqliyyata, o cümlədən yol infrastrukturu sahəsindəki yeniliklərə həsr olunacaq. Beləliklə, konfrans peşəkarların təcrübə mübadiləsi, uğurları ilə bölüşmələri və əsas inkişaf təmayüllərini izləmələri üçün gözəl imkan yaradacaqdır.
"TransCaspian 2011" sərgisini fərqləndirən cəhət ondan ibarətdir ki, ilk dəfə olaraq sərgi ilə eyni meydançada yeni layihənin, yəni 1-ci Xəzər Beynəlxalq Yol İnfrastrukturu və İctimai Nəqliyyat Road& Traffic sərgisinin debütü baş tutacaq. Bu sərgilərin bir yerdə keçirilməsi isə bütün maraqlı tərəflərin səmərəli ünsiyyət qurmaları üçün münasib şəraiti təmin edəcəkdir.
Beləliklə, bu sərgi və konfrans bütün regionun nəqliyyat strukturlarının diqqətini Azərbaycana cəlb etməklə, Xəzər regionunun ildə bir dəfə keçirilən mühüm nəqliyyat layihəsi statusunu təsdiq edəcək. Azərbaycanın nəqliyyat sahəsində baş verən hadisələrin fəal dinamikasını əks etdirən bu sərgi sərmayələrin cəlb edilməsinə və yerli infrastrukturun təkmilləşdirilməsinə təkan verir.
İştirakçılar üçün isə sərgi öz məhsullarını sərfəli şəkildə təqdim etmək, işgüzar əlaqələr qurmaq və bu əlaqələri genişləndirmək, ticarət sövdələşmələri bağlamaq, işgüzar həmkarları ilə təcrübə mübadiləsi aparmaq, bazarın yeni təmayülləri ilə tanış olmaq və rəqiblərin fonunda öz nailiyyətlərini tam dürüst şəkildə qiymətləndirmək üçün gözəl imkan yaradır.
Milli.Az
İqtisadiyyat
Bakıda Beynəlxalq Nəqliyyat, Tranzit və Loqistika Sərgisi keçiriləcək
14 İyun 2011 17:59
Baxış: 632
DİGƏR XƏBƏRLƏR
- Azərbaycanda vergi güzəştləri tətbiq ediləcək
- Azərbaycanda elektron siqaret qadağan oluna bilər
- Xaricdən aşağı keyfiyyətli siqaretin gətirilməsinin qarşısı alınacaq – Yeni QANUN
- Azərbaycanda bu məhsul ucuzlaşdı
- Azərbaycanla Türkiyə arasında ikiqat vergitutma aradan qaldırılır
- Azərbaycan nefti cüzi ucuzlaşdı
XƏBƏR LENTİ
- Alkoqol və narkotikdən uzaq 16 il - FOTO
- Azərbaycan Prezidenti: İndi bizim sülh sazişinin necə olması ilə bağlı ümumi anlayışımız var
- Ceyhun Bayramov Çexiya Baş naziri ilə görüşüb
- Putinin andiçməsi bu tarixdə olacaq
- Mən öz puluma süni ada yaradıramsa... - Deputat
- “Elməddin Azərbaycanın “Şabanı”dır”
- Prezident: Azərbaycan iqtisadiyyatı böhran vəziyyətində də sabit artım göstərdi
- İlham Əliyev: COP29-un uğurla keçməsini istəyirik
- Novak Cokoviç Lionel Messini qabaqlayıb - FOTO
- Mer çıxışı zamanı rüsvay oldu - VİDEO
- Aysun qızına bu adı QOYACAQ – VİDEO
- Prezident: Ermənistanı istisna olmaqda, Avrasiya İqtisadi Birliyinə üzv ölkələrlə çox sıx tərəfdaşlıq münasibətlərimiz var
- İlham Əliyev: COP29 beynəlxalq ictimaiyyətin Azərbaycana böyük hörmət və dəstəyinin təzahürüdür
- DTX nümayəndələrinin maaşı ilə bağlı QƏRAR
- Nişanlı qız faciəli şəkildə öldü - Azərbaycanda dəhşət - FOTO
- Şoyqu: Ukrayna müharibə başlayandan yarım milyon hərbçisini itirib
- Növbəti köç karvanı Füzuliyə çatdı - YENİLƏNİB - FOTO
- Cavanşir Məmmədovun ölümü ilə bağlı tükürpədici detal - "Yuxuda görüb ki..." - VİDEO
- ADA Universitetində beynəlxalq forum keçirilir, prezident iştirak edir - VİDEOYAYIM - FOTO
- "Yeddi oğul istərəm"in aktyorları 54 il sonra bir arada - VİDEO
- Ən çalışqan bürclər - Həmişə uğur qazanırlar
- Nazir müavini: “Ermənilərin mina tələləri quraşdırması ilə bağlı yeni sübutlar var”
- “İndi Paşinyan da bunu anlayır”
- Süleyman Ələsgərovun 100 illiyinə həsr olunmuş "Xalqin mədəni sərvəti" layihəsinin təntənəli bağlaniş mərasimi Gəncədə baş tutdu - FOTO