Rusiyada öldürülən gəlinin atası: "Dedi, bəlkə, sevəni olub, onunla qaçıb" - VİDEO

Rusiyada  toyundan bir həftə sonra itkin düşən və bir neçə gün əvvəl əri tərəfindən öldürüldüyü məlum olan Gülnar Vəliyevanın meyidi bu gün baba ocağına gətirilib. ANS TV-nin məlumatına görə, 23 yaşlı gəlin Masallı rayonunun Ərkivan qəsəbə qəbristanlığında  torpağa tapşırılıb. Rusiyadakı universitetlərdən birinin stomatologiya ixtisasının 1-ci kurs tələbəsi olmuş Gülnar Vəliyevanın Sankt-Peterburqda aprelin 22-nə keçən gecə itkin düşdüyü deyilirdi.

Əri tərəfindən öldürülən gəlinin meyiti Azərbaycana gətirildi

Yaxınları bildirirlər ki, Samir və Gülnar aprelin 15-də evləniblər və bundan sonra qız həyat yoldaşının Marşal Jukov prospektində yerləşən mənzilinə köçüb. Bir həftə sonra isə cavan gəlin yoxa çıxıb. Baş verən hadisə barədə danışan  Gülnarın atası Samirin Gülnarı sevərək evləndiyini və institutda oxumağına mane olmadığını, amma çox qısqanc olduğunu, anası ilə əlaqə saxlamağa icazə verdiyini deyib. Atanın bildirdiyinə görə, ailənin Samirin 2004-2009-cu illərdə Rusiyada həbsdə olmasından xəbəri olmayıb. Ona görə qız itkin düşəndə valideynlərin ürəyinə xal düşsə də, qarşı tərəf əksinə, Vəliyevləri günahlandırıb. 

"Ata-anası başladılar ki, biz bilmirik, bizlik deyil. Bizim xəbərimiz yoxdur. Samir deyir ki, bəlkə, sevəni olub, onunla qaçıb. Dedim, sən onu ilyarımdır tanıyırsan", - deyə qətlə yetirilən gəlinin atası Şücaət Vəliyev bildirib.

Gülnardan 11 yaş böyük olan həyat yoldaşı 34 yaşlı Samir Həbibov may ayının 26-da istintaq tərəfindən saxlandıqda hadisənin ehtiyatsızlıq səbəbindən baş verdiyini söyləsə də zərərçəkən tərəf buna inanmır və ona ən ağır cəzanı tələb edir.

""Zaryadnoyu" istədim, dedim, onu ver, vermədi, mən də vurdum, uşaq dəydi harasa, özündən getdi". Mən amma inanmıram. Burada başqa nəsə var. Qoy müstəntiqlər araşdırsınlar. Cəzasını alsın qanunla", - deyə Gülnar Vəliyevanın atası söyləyib.

Ötən həftə gənc gəlinin həyat yoldaşı Samir Həbibov həyat yoldaşının qətlində şübhəli bilinərək saxlanılıb. İndi onu törətdiyi əmələ görə  Rusiya qanunvericiliyinin  müvafiq maddələri ilə 15 ilədək həbs cəzası gözləyir.

Videonu izləmək üçün şəklə klikləyin:

Milli.Az