Gürcüstan vətəndaşı ölkəmizdə asan yolla pul qazanmaq istəyinə düşdü.
Borcunu qaytarmaqda çətinlik çəkən xalası oğlunu da öz cinayət əməlinə alət edən şəxs Bakıda niyyətinə çata bilmədiyini görəndə Qazağa üz tutdu. Mağazalara qənim kəsilənlər polisə elə buradaca yaxalandılar.
Kəpəz TV (Region TV) xəbər verir ki, Gürcüstan vətəndaşı, 22 yaşlı Elnur Əliyev və onun qohumu, Bakı şəhər sakini Ceyhun Nəsibov Qazaxda 4 mağazadan pul və mobil telefon üçün danışıq kartları oğurlamaqda təqsirləndirilirlər. Onlar mağaza sahiblərinə ümumilikdə 1100 manat məbləğində ziyan vurublar. Polisin saxladığı qohumlar ilkin ifadələrində burada törətdikləri cinayət əməlindən öncə paytaxtda bir neçə mağazanı qarət etməyi planlaşdırdıqlarını etiraf ediblər. Obyektlərə quraşdırılan təhlükəsizlik siqnalı onları fikirlərindən daşındırıb. Qazaxda isə işlərinin daha asan olacağını düşünüblər.
Saxlanılan şəxslərin digər cinayətlərdə iştirakı istisna edilmir.
Milli.Az