Ölkə

Dövlət Gömrük Komitəsi: "Heç bir problem yaşanmayıb"

26 May 2017 18:53

0 Şərh Baxış: 632

#CƏMİYYƏT #İQTİSADİYYAT

Dövlət Gömrük Komitəsi (DGK) Vahid Avtomatlaşdırılmış İdarəetmə Sistemində (VAİS) problemlərin yaranması ilə bağlı yayılan məlumatlara münasibət bildirib.

Komitənin mətbuat xidmətindən Milli.az-a bildirilib ki, DGK-nin Vahid Avtomatlaşdırılmış İdarəetmə Sistemində problemlərin yarandığını və buna görə 4 saat müddətində müvafiq gömrük prosedurları və yoxlamalar, avtomobillərin və sərnişinlərin gömrük zonasının ərazisinə giriş-çıxışının həyata keçirilə bilmədiyi barədə yayılan məlumatlar həqiqətə uyğun deyil.

Dövlət Gömrük Komitəsi bildirir ki, 2017-ci ilin 25 may saat 21:00-dan başlayaraq 26 may saat 04:00 qədər DGK tərəfindən informasiya resurslarının və informasiya sistemlərinin təhlükəsizliyinin yoxlanılması və təkmilləşdirilməsi məqsədilə planlaşdırılmış yüklənmə testləri həyata keçirilib və Komitənin mütəxəssisləri tərəfindən aparılmış sınaqlar uğurla başa çatdırılıb:

"Sınaqların həyata keçirildiyi müddətdə VAİS-də müəyyən ləngimələr baş versə də, müvafiq gömrük prosedurları və yoxlamalar, avtomobillərin və sərnişinlərin gömrük zonasının ərazisinə giriş-çıxışının həyata keçirilməsi, eləcə də sistemin təhlükəsizliyi ilə bağlı heç bir problem yaşanmayıb".

Milli.Az

Digər maraqlı xəbərlər Milli.Az-ın Facebook səhifəsində