Ölkə

Azərbaycanda kəskin abituriyent azalması - Ödənişdən sonra

29 Mart 2017 11:14
5 Şərh     Baxış: 2 283
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

2017-ci ildə magistr pilləsinə qəbul olmaq üçün sənəd qəbulu başa çatıb.

Ortaya çıxan rəqəmlər isə ötən illərdəkindən əsaslı şəkildə fərqlənir. 

Milli.Az xəbər verir ki, bununla bağlı apardığı araşdırmanı qafqazinfo-ya danışan təhsil məsələləri üzrə ekspert Kamran Əsədov qeyd edib ki, 17 mart saat 23:59-da sənəd qəbulunun başa çatmağı planlaşdırılsa da, qeydiyyatdan keçənlərin azlığı səbəbi ilə bu vaxt 28 marta qədər uzadıldı: 

"DİM-in saytında olan məlumata görə, təsdiq edilmiş ərizələrin sayı Azərbaycan bölməsi üzrə 11809, rus bölməsi üzrə 1264 olub. Beləliklə, 2017/2018-ci tədris ilində magistr pilləsinə sənəd qəbulunda cəmi 13 073 bakalavr ərizəsini təsdiq edib.

Müqayisə üçün qeyd edim ki, 2016-cı ildə imtahanda iştirak etmək üçün 24110 bakalavr ərizə təqdim etmişdi. Onlardan 21 822 nəfəri Azərbaycan bölməsi, 2288 nəfəri rus bölməsi üzrə imtahan verib. Ərizə verənlərin 10281 nəfəri oğlan, 13829 nəfəri isə qızlar olub.

Bakalavrlardan 11550 nəfəri 2016-cı ilin ilin məzunları, 12560 nəfəri isə əvvəlki illərin məzunları olub. 2016-cı ildə 63 nəfər xarici ölkə vətəndaşı da sənəd qəbulunda iştirak edib. 

2015-ci ildə magistr pilləsinə ərizələrin qəbulu internet vasitəsilə fevralın 3-dən 12-dək aparılıb. 2015-ci ildə imtahanda iştirak etmək üçün 23230 (2014-cü ildə 24560) bakalavr ərizə təqdim etmişdi. Onlardan 20706 nəfəri Azərbaycan bölməsi, 2524 nəfəri rus bölməsi üzrə imtahan verib. Ərizə verənlərin 10913 nəfəri oğlan, 12317 nəfəri isə qızlar təşkil edib. 2015-ci ildə magistr pilləsinə sənəd verən bakalavrlardan 11620 nəfəri 2015-ci ilin məzunları, 11610 nəfəri isə əvvəlki illərin məzunlarıdır.

2016-cı ildə 50 nəfər xarici ölkə vətəndaşı da sənəd qəbulunda iştirak etmişdi. 

2016/2017-ci tədris ilində magistraturaya qəbul imtahanında iştirak etmək üçün ümumilikdə 24110 bakalavr qeydiyyatdan keçib. İki mərhələdə keçirilən imtahanın nəticələrinə əsasən, 5184 bakalavr respublikanın ali təhsil müəssisələrinin magistraturalarına qəbul olub. Lakin qəbul olanlardan 730 nəfəri (14 %) müəyyən olunmuş vaxtda ali məktəblərdə qeydiyyatdan keçməyib. Boş qalan plan yerlərinə aparılan müsabiqədə isə əlavə olaraq 305 nəfər magistratura səviyyəsinə qəbul olub. 

2016-cı il ali təhsil müəssisələrinin magistratura səviyyəsinə Azərbaycan bölməsi üzrə 5142 (69.85 %), rus bölməsi üzrə 825 (11.21 %), birgə müsabiqə əsasında isə 1395 (18.95%) yer olmaqla ümumilikdə 7362 plan yeri ayrılıb. İmtahanının nəticələrinə əsasən, 4769 bakalavr (Azərbaycan bölməsi üzrə 4312, rus bölməsi üzrə 457) magistratura səviyyəsinə qəbul olunub. Onlardan 2209 nəfəri dövlət sifarişi əsasında təhsil almaq hüququ əldə edib. 

Rəsmi rəqəmlərdən də göründüyü kimi, qəbul planı 64.78 % dolub. Plan yerlərindən 2593-ü (35.22 %) boş qalıb. 2016-cı ildə yalnız plan yerləri isə 80 faizdən çox dolub. 2015-ci ildə isə ayrılmış 6289 plan yerinə 5017 bakalavr (onlardan 2002 nəfəri dövlət sifarişi əsasında) qəbul olub və plan yerləri 79.77% dolub. 

Bu il magistr pilləsinə qəbul plan yerlərinin artdığını və 8 minə çatdığını nəzərə alsaq, ciddi şəkildə plan yerinin boş qalacağı qaçılmazdır.

Bundan əlavə, 2017/2018-ci tədris ilində ali tibb təhsili əsasında həkim mütəxəssislərin hazırlanması məqsədi ilə rezidenturaya sənəd vermək istəyənlərin sayı Azərbaycan bölməsi üzrə 923, rus bölməsi  üzrə 152, cəmi 1075 nəfər təşkil edib. 

2016-cı ildə isə, bu rəqəm 1239 nəfər, 2015-ci ildə 1245 nəfər təşkil edirdi".

Ekspert DİM-in bu il qeydiyyatdan keçən magistr və rezidentlərin ərizələrindən əldə etdiyi gəlirə də toxunub. 

Onun sözlərinə görə, magistr pilləsinə qəbul olmaq üçün birinci mərhələdən qeydiyyatdan keçən bakalavrların sayı 13 073 nəfərdir: "Hər bir bakalavr imtahanın birinci mərhələsində iştirak etmək üçün 50 manat ödəyib. Deməli, magistr imtahanının birinci mərhələsindən DİM 653 650 manat gəlir əldə edib. Rezidenturaya qəbul olmaq istəyənlərin sayı isə 1075- dir. Rezidenturaya qəbul olmaq istəyənlərin isə hər biri birinci mərhələdə iştirak etmək üçün 60 manat ödəyib. Məlum olur ki, rezidenturaya imtahanının birinci mərhəlsindən DİM 64 500 manat gəlir əldə edib. Bu rəqəmləri toplasaq aydın olar ki, DİM magistr və rezidenturaya qəbul imtahanlarının birinci mərhələsindən 718 150 manat gəlir əldə edib".

Milli.Az

Digər maraqlı xəbərlər Milli.Az-ın Facebook səhifəsində

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.