Ölkə

"BakuBus"dan çağırış: ""Sərnişin məsuliyyəti" anlayışı formalaşmalıdır"

24 Fevral 2017 12:03
0 Şərh     Baxış: 3 729
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Cəmiyyətdə "sərnişin məsuliyyəti" anlayışı formalaşmalıdır.

"BakuBus" MMC-nin Mətbuat və ictimaiyyətlə əlaqələr şöbəsinin müdiri Mansur Piriyevin Milli.Az-a müsahibəsi:

- Mansur müəllim, "BakuBus" digər daşıyıcı şirkətlərdən ortaya daha keyfiyyətli xidmət qoymaqla yanaşı, sərnişinlərlə də intensiv ünsiyyət qurmağı bacarır. Bu sahədə şirkətin iş prinsipi necə qurulub?

- Bütün xidmət sahələrində səmərəli və effektiv nəticənin əldə olunması tərəflərin münasibətlərindən asılıdır. Sərnişindaşıma fəaliyyəti də bir xidmət növüdür.  Əlbəttə, xidmət varsa, münasibət və təbii ki, qarşılıqlı məsuliyyət də olmalıdır.

"BakuBus" xidməti fəaliyyətində hər zaman işin daha səmərəli təşkil olunması üçün sərnişin məmnunluğunu əsas götürür. Çünki burada ən vacib amil sərnişinlərimizin onlara göstərilən xidmətdən razı qalması və rahat, təhlükəsiz bir mühitdə mənzil başına çatdırılmasıdır. Buna görə də həm qaynar xətt, həm də sosial şəbəkə vasitəsi ilə mütamadi olarq sərnişinlərimizin münasibətini öyrənirik. Eyni zamanda günün 24 saatı sərnişinlərin şikayətlərini, təkliflərini və müsbət fikirlərini qəbul edib araşdırır, konkret tədbirlər görürük. Biz sürücülərimizlə yanaşı sərnişinlərimizlə də işləyirik. Onlarla daimi ünsiyyətdəyik. Hətta hər gün zəng edən, yazan sərnişinlərimiz də var.
 

- Təhlillər nə göstərir? Sərnişinlər şikayətlərində nə qədər haqlı olurlar?

- Gün ərzində *4242 nömrəli "qaynar xətt"imizə və şirkətin Facebook səhifəsinə daxil olan şikayətlərin araşdırılması zamanı öz təsdiqini tapan müraciətlərlə yanaşı, əsassız müraciətlərin də kifayət qədər olduğunu görürük. Bu kimi halların yaranması gündəlik iş şəraitində baş verən müəyyən çatışmazlıqlarla yanaşı, bəzi sərnişinlərin ictimai nəqliyyatdan istifadə zamanı mövcud qaydalar haqqında kifayət qədər məlumatlı olmamaları və konkret olaraq bu qaydalara əməl etməmələri ilə bağlıdır.

Bəzən avtobusa daxil olan sərnişin heç bir məsuliyyət hiss etmədən sürücülərə, hətta digər sərnişinlərə qarşı kobudluq, aqressivlik və digər xoşagəlməz hallara yol verir, sonra da əlini-qolunu sallayaraq növbəti dayanacaqda enir. Təbii ki, bu cür sərnişinlərin dolayısı ilə bəzən yol qəzalarına səbəb olduğu və ya buna şərait yaratdığı hallar da qeydə alınıb. Eyni zamanda avtobusun salonunu çirkləndirən, məişət tullantılarını, ərzaq qalıqlarını avtobusa ataraq antisanitar vəziyyət yaradan, oturacaqları zədələyən, yazan sərnişinlər də var. Bütün bunlar diqqətə alınmalı və cəmiyyətdə "sərnişin məsuliyyəti" anlayışı formalaşmalıdır. Artıq vaxtı çatıb...

- Sərnişinlər bəzən avtobus xətlərində çoxlu gecikmələrin olduğundan da şikayətlənirlər. Gecikmələr əsasən hansı səbəblərdən qaynaqlanır?

- Daxil olan şikayətləri araşdırdıqda görürük ki, bəli, intervallarda gecikmələr olur. Bu da əsasən günün müxtəlif vaxtlarında bəzi küçələrdəkı tıxac, avtomobil sıxlığı və ya digər səbəblərdən yolun bağlanmasından olur. Lakin bəzən sərnişinlər özləri də gecikmələr yaradırlar. Müşahidələr göstərir ki, əsasən səhər saatlarında işə və axşamlar evə tələsən sərnişinlər ödəniş kartlarının oxudulması qaydasına yetərincə əməl etmirlər. Bəzən dayanacaqda avtobusa minməyə çalışan 20-30 nəfərin olmasına baxmayaraq, daxil olan sərnişin validatorun qarşısında ödəniş kartını çıxarmaq üçün ciblərini, çantalarını axtarır. Əgər hər iki sərnişindən biri bunu edərsə, təbii ki, həm avtobus cədvəl üzrə çıxış vaxtına gecikir, həm də sərnişinlər arasında narazılıq yaranır. Nəzərə alsaq ki, həmin vəziyyətdə avtobusa minməyə çalışanlar içərisində yaşlı insanlar, uşaqlı və ya hamilə qadınlar da olur, o zaman sərnişinlərin ödəniş kartını əvvəlcədən hazır tutmalarının nə qədər vacib olduğunu görərik. Bu nədir ki? Uşaqları və ya daşıdıqları əşyaları, yükü avtobusun girişində saxlayıb ödəniş kartına pul yükləmək üçün avtobusu ləngidən sərnişinlər də var. Bütün bunlar gündəlik olaraq  qaynar xəttimizə daxil olan şikayətlərin videogörüntülərlə araşdırılması zamanı gecikmələrə səbəb olan hadisələr kimi qarşımıza çıxır.

- Bunların olmaması üçün nə etmək lazımdır?

- Ümumiyyətlə ictimai nəqliyyatdan istifadə edən sərnişinlərimiz avtobusa daxil olarkən və ya düşərkən nəzərə almalıdırlar ki, marşrut xəttinin ümumi axınına, intervallara təsir edəcək hər hansı hərəkətlərə, subyektiv səbəblərlə bağlı ləngimələrə yol vermək olmaz. Çünki əgər söhbət ictimai nəqliyyatdan gedirsə, burada əsas meyar ictimai maraq, ictimai mənafe götürülür. Sərnişinlər avtobusa daxil olarkən ödəniş kartlarını əvvəlcədən əllərində hazır tutmalıdırlar. Bundan əlavə, avtobusu gözləyərkən dayanacaqdakı ödəniş terminalında hər ehtimala qarşı kartın balansını yoxlamaq da daha yaxşı olar. Eləcə də ləngimələrə səbəb olmamaq üçün avtobusa daxil olarkən arxaya, düşərkən isə əvvəlcədən çıxışa yaxınlaşmalıdırlar.

Qəbul etmək lazımdır ki, bu gün doğma Bakımızda yaradılmış ən optimal sistemin daha səmərəli və effektiv işləməsi daşıyıcı şirkətlərlə yanaşı sərnişinlərdən də asılıdır. Bunun üçün bəzi sərnişinlərimiz arzuolunmaz keçmiş vərdişləri unudub zamanın tələblərinə uyğun, müasir cəmiyyətlərdə istifadə olunan yeni vərdişlərə yiyələnməli, bütün sahələrdə olduğu kimi, ictimai nəqliyyatda da dövrün tələbləri ilə ayaqlaşmalıdırlar.

Əgər hamımız sərnişindaşıma xidmətində ciddi dəyişikliklər gözləyir və tələbkarlıq ediriksə, o zaman bu istiqamətdə baxışlarımızı, münasibətlərimizi bir daha gözdən keçirməliyik. Xüsusən də bu münasibətlərin, sosial mühitin formalaşdığı ictimai nəqliyyat və sərnişindaşıma xidmətləri ilə bağlı sahədirsə... Çünki burada hər birimiz iştirakçıyıq. Ona görə də illərdən bəri yaranmış neqativ vərdişləri birlikdə tərgitməli, stereotipləri birlikdə qırmalıyıq.

İlkin İzzət

Milli.Az

Digər maraqlı xəbərlər Milli.Az-ın Facebook səhifəsində

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.