Ölkə

Vidadi Zeynalov ziyanı ödəmək üçün əmlakını satışa çıxarmaq istəyir - YENİLƏNİB

22 Fevral 2017 17:10

3 Şərh Baxış: 2 741

#CƏMİYYƏT #KRİMİNAL #MƏHKƏMƏ

17:10

Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov və digərlərinin cinayət işi üzrə məhkəmə prosesi fasilədən sonra davam etdirilib.

Milli.Az APA-ya istinadən xəbər verir ki, hakim Əfqan Hacıyevin sədrliyi ilə keçirilən prosesdə cinayət işində olan sənədlərin tədqiqi davam etdirilib.

Məhkəmənin növbəti iclası fevralın 24-nə təyin edilib.

----------

13:19

Bu gün Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov və digərlərinin cinayət işi üzrə məhkəmə prosesi davam etdirilib.

Milli.Az APA-ya istinadən xəbər verir ki, hakim Əfqan Hacıyevin sədrliyi ilə keçirilən prosesdə
şahid qismində Rauf Babayev ifadə verib. O qeyd edib ki, "Kompas" şirkətində pulların köçürülməsi ilə məşğul olub: "Bizim nazirliklə müxtəlif layihələrimiz olurdu. Pul köçürmə ilə bağlı bizə faiz qalmayıb".

Digər şahidlərin prosesə gəlməməsi vəkillərin etirazına səbəb olub.

Hakim isə qeyd edib ki, digər şahidlərin məhkəməyə gətirilməsi üçün məcburi gətirilmə qərarı çıxarılıb.

Prosesdə V.Zeynalovun vəkili Ceyhun Yusifov Maliyyə Nazirliyinin ekspertlərinin məhkəmədə əlavə şahid qismində ifadə verməsi barədə vəsatət qaldırıb.

V.Zeynalovun digər vəkili Elxan Süleymanov deyib ki, Ticarət və Sənaye Palatasının, Maliyyə Nazirliyinin, Ədliyyə Nazirliyinin ekspert rəylərinə istinad edəndə təqsirləndirilən şəxslərin qiymətləri şişirdilməsi barədə qeydlərə rast gəlinir. Vəkil bildirib ki, həmin rəylər həqiqətə uyğun deyil: "Necə olur ki, əvvəllər də eyni şəkildə yoxlamalar aparılıb, amma bu pozuntular aşkar edilməyib? Yalnız indi, bu şəxslər həbs olunandan sonra bunlar ortaya çıxıb. Burada açıq-aydın Maliyyə Nazirliyinin qərəzi ortaya çıxır. Maliyyə Nazirliyi qeyri-büdcə təşkilatlarını yoxlamaq səlahiyyətinə malik deyil. Maliyyə Nazirliyinin alınan mallara qiymət qoymaq səlahiyyəti yoxdur, bu, birbaşa Vergilər Nazirliyinin işidir. Ona görə mühəndis-texniki ekspertizanın keçirilməsini barədə vəsatətə qaldırıram".

V. Zeynalov da qiymətlərin şişirdilməsi barədə rəylərə etirazını bildirib: "Maliyyə Nazirliyi özündən qiymətlər yazıb. Bu baxımdan biz Maliyyə Nazirliyinin rəylərini qəbul etmirik".

Vidadi Zeynalovun digər vəkili Bəylər Məmişov hüquqlarını müdafiə etdiyi şəxsin əmlakları üzərindən həbsin götürülməsi haqqında vəsatət verib. Onun sözlərinə görə, dövlətə vurulmuş ziyanın ödənilməsi üçün V. Zeynalovun iki əmlakının üzərindən həbs götürülməli və bu əmlaklar satışa çıxarılaraq ziyan ödənilməlidir. O, əmlakların dəyəri və ünvanı barədə yazılı vəsatəti məhkəməyə təqdim edib.

Məhkəmə Kollegiyası vəsatətləri hazırki mərhələdə baxılmamış saxlayıb. Hakim qeyd edib ki, vəsatətlərə sənədlərin tədqiqi mərhələsindən sonra münasibət bildiriləcək.

Sonra sənədlərin tədqiqi mərhələsinə başlanılıb.

Prosesdə fasilə elan olunub.

Qeyd edək ki, həyata keçirilmiş istintaq-əməliyyat tədbirləri ilə Bakı Telefon Rabitəsi İstehsalat Birliyinin baş direktoru Beytulla Hüseynovun 2009-2015-ci illərdə arvadının təsisçisi olduğu "Bakı Rabitə Təmir Tikinti" və "Təmir Təchizat Servis" MMC-lərinin direktoru Bayram Vəliyev, yaxın münasibətlərdə olduğu "3 nömrəli Rabitə Təmir Tikinti", "Rabitə Mülki Tikinti" MMC-lərinin direktoru Emin Məmmədov və birliyin baş mühasibi Anar Mustafayevlə qabaqcadan əlbir olub yeni rabitə xətlərinin çəkilməsi, binaların, qurğuların təmiri-tikintisi və sair işlərin yerinə yetirilməsi üçün onların hesablaşma hesablarına köçürüləcək pul vəsaitlərinin işlərin həcmindən asılı olaraq 35-45% həcmində hissəsinin nağdlaşdırılaraq B. Hüseynovun özünə verilməsi barədə razılığa gəliblər. B. Hüseynov tabeliyində olan qovşaqların formal olaraq keçirdikləri tenderlərdə vəzifə saxtakarlığı ilə həmin məhdud məsuliyyətli cəmiyyətlərin qalib elan olunaraq müqavilələr bağlanmaqla və faktiki işlərin tam icra olunmadığı halda, o cümlədən internet xidmətinin təmin edilməsi üçün fiber-optik kabel xətlərinin çəkilişi zamanı işlərin faktiki olaraq telefon qovşaqları tərəfindən aparıldığı halda guya həmin işlərin faktiki özünə məxsus olan müəssisələr tərəfindən görülməsi və işlərin həcminin artırılması barədə saxta sənədlərin tərtib edilməsi yolu ilə adıçəkilən MMC-lərin hesabına köçürülmüş ümumilikdə 71 milyon 263 min manat məbləğində vəsaitin 21 milyon 379 min manatını mənimsəməklə dövlətin qanunla qorunan mənafelərinə ağır nəticələrə səbəb olan zərər vurmalarında şübhələr üçün əsaslar müəyyənləşib.

Nazirliyin Aparat rəhbəri Vidadi Zeynalovun qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat vəsaitin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyən edilib.

Cinayət işi üzrə nazirliyin strukturuna daxil olan "Aztelekom" MMC, "AzİnTelekom" MMC, "Azərpoçt" MMC, Məlumat Hesablama Mərkəzi və özəl şirkət "Optik Rabitə Tikinti və Quraşdırma" MMC-nin fəaliyyətində də mənimsəmə və israf etmə, vəzifə səlahiyyətlərindən sui-istifadə və vəzifə saxtakarlığı faktları müəyyənləşib.

İş üzrə Beytulla Hüseynov, Anar Mustafayev, Emin Məmmədov, Bayram Vəliyevə və "Aztelekom" MMC-nin baş mühasibi Oktay Rüstəmova Cinayət Məcəlləsinin 179.3.2 (külli miqdarda mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), Vidadi Zeynalova, həmçinin "AzİnTelekom" MMC-nin baş direktoru Cəlil Cəfərova, "Azərpoçt" MMC-nin baş direktoru Qəmbər Bəybalayevə və "Optik Rabitə, Tikinti və Quraşdırma" MMC-nin direktoru Namazalı Məmmədova həmin məcəllənin 179.3.2 və 308.2-ci, MMC-nin baş mühasibi Səhrab Hümbətova isə 179.3.2, 308.2 və 313-cü maddələrdə nəzərdə tutulan ittiham elan edilməklə barələrində məhkəmənin müvafiq qərarları ilə həbs qətimkan tədbiri seçilib.